986 Acta Apostolicae Sedis - Commentarium Officiale

ZAMORENSIS

Beatificationis et Canonizationis Servae Dei Mariae Rocío a Iesu Crucifixo (in

saeculo: Mariae Iosephae Rodríguez Xuárez de la Guardia) Sororis professae Con-

gregationis Sororum Amoris Dei (1923-1956)

DECRETUM SUPER VIRTUTIBUS

« Caritas Christi urget nos » (2 Cor 5, 14).

Sententia haec universam Servae Dei Mariae Rocío a Iesu Crucifixo (in

saeculo: Mariae Iosephae Rodríguez Xuárez de la Guardia) vere inflammavit

operam et conversationem.

Serva Dei die 16 mensis Maii anno 1923 in vico Colmenar prope Malacam

in Hispania orta est. Ad fontem regenerationis insequenti die 23 eiusdem

mensis Maii ducta, septem annos nata Primam Communionem recepit, quae

vitam eius adeo promptius persignavit, ut « Iesus Eucharistia paulatim meam

reformabat vitam » dictitaret ipsa. Studiorum annis, cum apostolicam quasi

haberet vocationem, navam exercuit actuositatem: nam, multum impendit

pro sodalibus scholae et amicis bonum laborem, quarum sedula, verbo et

opere iisdem omnimodis subveniens ac litteras idcirco scribens, exaudie-

bat necessitates. Missio ei princeps Iesum et Beatissimam Virginem curare

cognoscendos.

Adhuc adulescens Consociationem cui nomen « Societas Foedus in Iesu

per Mariam » cognovit, cuius facta membrum castitatis virtuti tuendae at-

que amori erga Beatam Mariam Virginem omnino sese consecravit. Eodem

vitae tempore eoque magis in religione, austeram atque sobriam degit vi-

tam. Virtutem enim castitatis uti responsum ad divinam praelationem et

purissimam eiusdem dilectionem vixit, sicuti obtestabatur: « Nata sum ei

eiusque sempiterne ero ».

Iam inde a pueritia, praesertim autem a iuventute et ab inita vita reli-

giosa, benignissima eiusdem oblatio pro bono egenorum facile inspici potest.

Soror Rocío Evangelium pauperibus nuntiabat, quibus corpore et animo

subveniebat. Ubicumque degit - Rondae scilicet, Bullis, Salmanticae atque

Romae -, non modo dispertitis eleemosynis, sed consolatione iucunditateque

ac sollicitudine omnibus dilargitis, speciales cum singulis inferiorum prae-

sertim societatis ordinum iunxit nexus, quod pro amore Christi et propter

cor eiusdem amantissimum peragebat.