Congregatio de Causis Sanctorum 1011

BARCINONENSIS

Beatificationis seu Declarationis Martyrii Servarum Dei Mariae a Monte Serrato (in saeculo: Iosephae García y Solanas) et VIII Sociarum Sororum professarum Instituti Minimarum Discalceatarum Sancti Francisci de Paula necnon Lucretiae García Solanas Christifidelis Laicae († 1936)

DECRETUM SUPER MARTYRIO

«In ipsis etiam missis vos devote precari consulimus, ut Christi mors

pretiosa fiat vestra vita et eiusdem dolor vestra medicina, ipsius quoque

labor requies aeterna» ( Regula Tertii Ordinis Minimorum, cap. III).

Hac oratione piissimus ille paenitens, quem Sanctum dicimus Francis-

cum de Paula, Ordinis Minimorum legiferum patrem, suos filios filiasque,

ut Christi sequelam amplecterentur totique Ipsius essent, Dei Verbo instinc-

tus admonuit. Cuius cum mores disciplinamque essent fideles hae Divini

Martyris sponsae per omnem vitam imitantes, mortem eaedem oppetere

non expaverunt, quin immo ad Agni nuptias pie submisseque properarunt.

Nam quarto saeculi vicesimi decennio volvente, in Hispania, id quod

constat inter omnes, cum esset a regis dominatione in libertatem res populi

vindicata, homines impii atque catholico nomini maxime infesti, civitatis

imperium pro tempore obtinentes, ad Ecclesiam in Hibericam gentem pe-

nitus evertendam omne palam studium ingeniumque contulerunt.

Itaque sacra publica imminuta sunt; leges, quae iniquissimo statuto

Christianae religioni obsisterent, promulgatae sunt; demun nefaria haud

raro capta sunt consilia incedendi sacras domos ubique, templa diruendi

delendique simulacra; praeterea insimulandi falsis criminibus sacerdotes

egregios et viros Deo mancipatos et plures e laicorum ordine Christifideles,

ipsosque ad mortem rapiendi et summo supplicio mactandi.

Quae quidem superba et crudelia facinora, quantum Hispanis luctum

attulerint, nemo non videt. At immanis haec persecutio, a Christiani nominis

osoribus excitata, Cataloniam quoque pervadit, eadem a die 18 mensis Iulii,

anno 1936, cotidie ingravescit; cuius incendium haud fere prius restingui

potuit quam bellum compositum foret. Ad cives seditiosos et turbulentos,

Ecclesiae reique Christianae adversantes, summa potestas est delata; qui

impune grassantes ad sacra penitus abolenda atque tollenda, ad ipsam

religionem ex animis radicitus extrahendam in primis incubuere.