Acta Apostolicae Sedis - Commentarium Officiale380

CONGREGATIO DE CAUSIS SANCTORUM

DRESDENSIS-MISNENSIS

Beatificationis seu Declarationis Martyrii Servi Dei Aloisii Andritzki, Sacerdotis

dioecesani ({ 3 Februarii 1943)

DECRETUM SUPER MARTYRIO

« Et quis est qui vobis noceat, si boni aemulatores fuerits? Sed et si pati-

mini propter iustitiam, beati! Timorem autem eorum ne timueritis et non

conturbemini, Dominum autem Christum sanctificate in cordibus vestris,

parati semper ad defensionem omni poscenti vos rationem de ea, quae in

vobis est spe » (1 Pt 3, 13-15).

Haec Apostoli Petri exhortatio ad humanum et Christianum exitum

sacerdotis Aloisii Andritzki referri potest. Hic sacerdos enim in vita et in

morte fulgidum testimonium suae deditionis in Dominum convenienter

praebuit et semper fidem suam palam professus est, sua sacra officia

firmiter ac aequaliter praestans.

Servus Dei 2 mensis Iulii anno 1914 in oppido vulgo dicto Radibor in

Germania natus est e familia Catholicae fidei firmissima, quae fuit in numero

gentium Soraborum. Oppidum Radibor enim, etsi eius omnis fere regio ad

Protestantium Reformationem adhaesit, tenaciter coniunctum Ecclesiae

Catholicae Romanae semper mansit. Parvulus Aloisius iam a pueritia inter

omnes eminuit pietate, animi generosa applicatione proximi adiuvandi, nec

non laeto ingenio et naturaliter versato in capienda omnium benevolentia.

Ordinarium cursum studiorum explevit et anno 1934 diplomate maturitatis

probatus est.

Illis iuvenilibus annis, Servus Dei animadvertere in se incepit vehemen-

tem desiderium capessendi sacerdotalem vitam, quam ob rem, Misnensis

Episcopi permissu obtento, in Seminarium dioecesanum admissus est. Illic

brevi tempore, existimationem omnium comparavit suo animo iucundo,

disciplina bene composito, moderato et probo, qui autem etiam in exercita-

tionibus corporis et in rebus artis musicae prodibat.