316. In Susceptione Pedis s. Victoris.

1 a. De profundis proclamemus
Et devote collaudemus
Victoris victoriam ;

1 b. Menti insit verus amor,

Quo procedat sanctus clamor
Ad martyris gloriam.

2 a. Dextri pedis susceptio,
Istius sancti portio
Novum parit gaudium ;

2 b. Quae pars in multis probata
Nobis fuit praesentata
Per manus fidelium.

3 a. Ex quo constanter calcavit
Et idolum Iovis stravit
De ministri manibus.

3 b. Quem incidi ocius
Iubet iudex impius
Suis satellitibus.

4 a. Sed, infelix hominum,
Nescis contra Dominum
Nil valere fraus tua?

4 b. Gressum rectum figere
Dei virtus propere
Facit gratia sua.

5 a. O fidelis anima,
Hic percipe, intima
Quanta vis sit fidei ;

5 b. Quod naturae deficit,
Fides pura perficit
Teste athleta Dei.

6 a. Completum est hodie,
Quod promissor gloriae,
Verus sol iustitiae,
Fons misericordiae
Sic ait discipulis:

6 b. Quidquid petieritis
Patrem, impetrabitis,
Dum sic credideritis
Et bene egeritis,
Ut convenit famulis.

7 a. Fides sine operibus

Nihil prodest homini
Apostolis testantibus,
Vicariis Domini ;

7 b. Uti corpus inutile

Est anima absente,

Sic de homine simile

Est fide indigente.

8 a. Animemur ergo, fratres,
Sanctos imitemur patres,
Pias admiremur matres
Calcantes terrestria ;

8 b. Conemur totis nisibus
Fidem amplecti cordibus,
Bonis adiunctis moribus
Sperantes caelestia.

9 a. Sancti ex fide vixerant,
Qua mundi regna vicerunt
Et aeterna meruerunt ;
Fides facit omnia.

9 b. Montes transfert, morbos
pellit
Ac tempestates repellit,
Vires daemonum compellit,
Tollit quaeque noxia.

10 a. Haec confirmat sanitatem,
Haec roborat castitatem,
Haec exornat dignitatem,
Haec conservat caritatem,
Copulat collegia ;

10 b. Haec splendet in infantibus,
Haec floret in iuvenibus,
Haec apparet in senibus,
Haec refulget in gradibus,
Custodit officia.

11a. O fidei huius dator,
Atque eius pius sator,
Verus cordis habitator,
Doni tui munerator,
Vota nostra suscipe ;

11 b. Fac nostras in te ferventes
Fidei calore mentes,
Nos agonem recolentes
Victoris et congaudentes
Tecum, secum accipe.