26. De sancta Agnete.

1 a. Sacra sacris concinentes
Sponso psallant occurrentes
Christo Sion filiae ;

1 b. Sonet melos vox canorum
Ante virginale thorum,
Assunt agni nuptiae.

2 a. Agnes agno copulatur,
Foederanda perornatur
Sponsa sponsi sanguine ;

2 b. Argumentum dat amoris,
Pro cruore dum cruoris
Rubricatur flumine.

3 a. Fide Christi subarrhata
Prece, donis est pulsata
A praefecti filio ;

3 b. Sponsam Christi se allegat
Et consensum prorsas negat
Carnali commercio.

4 a. Furit puer et tabescit
Et amoris vi languescit
Lectoque prosternitur ;

4 b. Causa morbi patri nota
Ad complenda nati vota
Rabidus devolvitur.

5 a. Fit Agnes mox comprehensa
Et hortatur, ut incensa
Immolet daemoniis.

5 b. Virgo constans hoc refutat
Et colentes hoc confutat
Aptis testimoniis.

6 a. Hinc puellam spoliari
Iubet iudex et scortari
Infami ludibrio.

6 b. Crine tecta scorto datur,
Missa stola confortatur
Angeli solacio.

7 a. Currens leno stimulatus
Mox exspirat suffocatus
Ad contactum virginis ;

7 b. Prece fusa suscitatur
Et in plebe roboratur
Fides Christi nominis.

8 a. Post haec ignes et ardores
Passa vicit et tortores,
Vindex flamma torruit;

8 b. Sic fit tosta sed non laesa,.
Decollatur ense caesa,
Et mors fidem astruit.

9 a. Eia, martyr, agonista,

Age, ne tuos sophista

Complantet fallacia,

9 b. Sed absorpta morte vita
Te sequamur via trita
Ad sponsi palatia.