250. De sancto Medardo.

1 a. Praesulis eximii
Matris Sion filii
Celebrent sollemnia,

1 b. Qui cum palma gloriae
Summi regis hodie
Transit ad palatia.

2 a. Hic sacerdos inclitus,
Iesu Christi praeditus
Speciali gratia,

2 b. Sanctitate claruit,
Nulla boni caruit
Pastoris industria.

3 a. Sensu puer senuit,
Viam vitae tenuit
Perstans in iustitia,

3 b. Pius, prudens, humilis,
Quietus et stabilis
Legis in custodia.

4 a. Summi gradus culmine
Sublimatus lumine
Dei replet atria,

4 b. Panem frangit parvulis
Verbi Dei, populis
Adponit cibaria.

5 a. Non pigrescit otio
Nec claudit sudario
Talentorum xenia.

5 b. Huius quippe tempore
Sacro crescit foenore
Domini pecunia.

6 a. Refrenatur sedulo
Castitatis cingulo
Lumborum lascivia.

6 b. Arcetur a stabulo
Lupus eius baculo
Furumque perfidia.

7 a. Alumnos ecclesiae
Caelestis militiae
Informat ad praelia.

7 b. Hostes tuba ductili
Deterrendo vigili
Propulsat excubia.

8 a. O ducem praecipuum,
O pastorem strenuum
Caeli dignum gloria.

8 b. O quam iuste praefuit,
Cuius tantum profuit
Sagax providentia.

9 a. Huius aucta studio,
Munita praesidio
Resultet ecclesia ;

9 b. Huius natalitio
Votiva cum gaudio
Solvendo praeconia.

10 a. Cuius hora funebris
Radiat in tenebris,
Dum supercaelestia

10 b. Luce fusa caelitus

Locum sancti transitus
Ornant luminaria.

11a. O Medarde, praesulum

Decus atque speculum,

Christo nos concilia,

11b. Ut post viae stadium
Vitae nobis bravium
Concedat in patria.