45. In Decollatione s. Antonini Placentini.

1 a. Martyr almus Antoninus,
Clarus miles Placentinus,
De clarorum genere,

1 c. Veneretur et laudetur,
Urbem istam qui tuetur
Sacrosancto munere.

2a. Cuius festum nunc acturi
Studeamus esse puri
Ac vivere sobrie,

2 b. Dignum digne collaudare
Ipsumque glorificare
Sine mentis carie.

3 a. Sanctus iste gloriosus,
Exsistens religiosus
Et miris virtutibus

3 b. Praeditus, iuste vivebat,
Auditores instruebat
De fide ac moribus.

4 a. Dum iret ad praedicandum
Et ad fidem convocandum
Omne genus hominum,

4 b. Prae calore, prae labore
Silibundo manens ore
Exoravit Dominum ;

5 a. Tunc Iesus, quem invocavit,
Fontem vivam praeparavit
Aperiens aridam,

5 b. Ex quo sanctum hunc potavit
Et corpus refrigeravit
Per divinam gratiam.

6 a. Hinc ad urbem Placentinam
Praedicendo mortem suam
Regressus est iterum,

6 b. Ubi post illusiones

Et post multas torsiones
Passus est martyrium.

7 a. Et cum esset decollatus,
Sanguis est coagulatus
Gloriosi martyris,

7 b. Ut nihil defraudaretur,
Sed totum conservaretur
Donum sancti corporis.

8 a. Caput aqua iam proiectum
Cum cruore est collectum
Per manum angelicam ;

8b. In navicella receptum

Sic ad urbem est devectum
Per Padum, per Treviam.

9 a. Festus quidam, christianus,
Vir in sancta fide sanus,
Suscepit haec munera ;

9 b. Sacrum locum praeparavit,
In quo caput collocavit
Atque membra cetera.

10 a. Sicque dudum occultata,
Sed sunt tandem revelata
Savino episcopo,

10 b. Cum quo sex fuerunt miri
Praesules sanctique [viri]
Operante Domino,

11a. Sacrum corpus recondentes,
Vaticinium implentes
Victoris sanctissimi ;

11b. Ubi laudes nunc solvuntur.
Atque preces offeruntur
Pro salute populi.

12 a. Sed nec ist ud est silendum,
Immo firmiter tenendum,
Quia gutta sanguinis

12 b. Fluxit membris de sacratis,
Fidem daret ut renatis,
Gloriosi martyris.

13 a. Sancte martyr Antonine,
Fac servire tibi digne
Hoc praesens collegium,

13 b. Praebe eis lumen verum,
Serva plebem, rege clerum-
Et nunc et in saeculum.