65. De sancta Martha.

1. Eia, recolamus

carmina Deo digna,

2. Chordas cordis

temperemus, sit pro chordis
cordium concordia.

3. Dulce melos

demus, cuius laus sanctorum
merces est gratissima.

4. Hodie

memoria iucunda

veneramur

Martham,

matrem sanctissimam

5. Quam factor

omnium, factus pauper,

caelo regnans,

terris

elegit hospitam.

6. Secus pedes vacat Maria ;
haec procurat sobria convivia.

7. Grata Deo Marthae actio ;
Mariae laudatur contemplatio.

8. Gaudet ille foetens Lazarus
se vocatum ab inferis.

9. Caeci visu, claudi donantur
gressu sanctae Marthae meritis.

10. Martha, nimium beata,
vita cuius admiranda,

11. Fide firma, spe robusta,
caritate inclita.

12. Mirabilis in illa
emicuit gratia,
ut et apostolorum
sit apostola:

13. Mortuos resuscitat,
daemonibus imperat,
serpentes tollit, tactu
lepram mundat.

14. Beatum praedicant

patrem, angelos qui cibavit ;

15. Martha beatior,

angelorum quae panem pavit.

16 Postremum decurso stadio
praesentium
fruitur regno sidereo,

17. Pro parvis donata maximis,
pro terrenis
praemia captans caelestia.

18. Christi, cara, prece tua
nobis detur venia,

19. Ut ad illam, quam speramus
te praeduce, patriam

20. Pertingamus
ope tua.