36. De sancto Blasio.

1. Sanctorum vita, virtus, gloria,
summi patris hostia,
suscipe, Christe, tuorum carmina ;

2. Pietate praecipua

mundi solvisti qui debita,
factus tuis ex gratia
via, veritas, vita;

3. Ignem mittens terrigenis
unguine sacri pneumatis
invictos post te milites
attraxisti martyres,

4. Qui mundi devicto principe
stolas laverunt agni sanguine

5. Atque triumphantes superam
insederant cum palma regiam.

6. In quorum collegio
mortis clarus poterio
iubilando nunc dulcisone
sabbatizas, Blasi sanctissime ;

7. Catenis, carceribus,
fustibus, pectinibus
probatus ut aurum in fornace,
victor caeli coruscas in arce.

8. Hinc flumine mersus
atque capite obtruncatus
angulari es lapide
coronatus.

9. Sic in caelis iunctus
illis ignitis lapidibus
fulges, praesul et martyr,
ornatius

10. Nunc ergo, paciferae
civis Ierosolymae,
solve captivos Babyloniae.

11. Tuo nos auxilio
educ de exsilio,
felici felix gaudimonio,

12. Quo nunc voce ac sensibus
tuis instantes laudibus

13. Post metam vitae labilis
tibi iungamur in caelis.