296 Acta Apostolicae Sedis - Commentarium Officiale

Saeviente bello civili, omnes angustias pertulit ac indignitates, dum

suum servaret eremum. Olim nocturno tempore a Syris militibus captum dux

ipse dimisit atque adeo illius precibus postea se commendavit. In custodia

vero supremum vitae biennium traduxit. Vita dura confectus idemque iam

tabe laborans, renidenti ore etiam cum extremum spiritum duceret omnium

animis pietatem addebat. Tandem in Berytensi valetudinario vitam caelo

reddidit die 19 Februarii anni 1978.

Sanctitatis fama, quam, dum viveret, omnium virtutum splendore sibi

comparaverat, post eius obitum adeo percrebuit, ut Cistercienses Strictio-

ris Observantiae, in quorum numero esse ille numquam desierat, generali

Consilio anno 1999 coacto, ipsius Dei Famuli causam quam primum suscipi

iuberent. Itaque in eparchiali curia Heliopolitana Graecorum Melkitarum,

a die 10 mensis Iunii, anno 2001, ad diem 10 mensis Martii, anno 2002, et

per rogatoriales Litteras Monte Regali et Belluni necnon in huius almae

Urbis Vicariatu, iure statutae Inquisitiones sunt peractae; quas omnes et

singulas haec ipsa Congregatio de Causis Sanctorum, edito Decreto die

30 mensis Maii, anno 2003, legitime probavit. Praeparata igitur Positione,

tralaticio more inita est disquisitio, an Dei Famuli virtutes, quas theolo-

gales, cardinales iisque adnexas vocant, heroicum gradum attigissent; de

quibus in Peculiari, qui dicitur, Theologorum Consultorum Congressu, die

29 mensis Ianuarii, eodem hoc vertente anno, prospere habito, actum est.

Dein propositum est dubium in Ordinaria Sessione, quae die 19 Novembris

proxime elapsi coacta est, cui praefui ego Angelus cardinalis Amato, Con-

gregationis de Causis Sanctorum Praefectus; in qua cuncti, qui intererant,

tum Patres Cardinales tum Episcopi Causis Sanctorum tractandis, ipsius

Dei Famuli virtutes, sive theologales sive cardinales, iisque adnexas, ad

gradum heroicum pervenisse quasi uno ore adfirmarunt.

Facta demum de hisce omnibus rebus Summo Pontifici Francisco per

subscriptum Cardinalem Praefectum accurata relatione, Sanctitas Sua, vota

Congregationis de Causis Sanctorum excipiens rataque habens, hodierno die

declaravit: Constare de virtutibus theologalibus Fide, Spe et Caritate tum in

Deum tum in proximum, necnon de cardinalibus Prudentia, Iustitia, Tem-

perantia et Fortitudine, iisque adnexis, in gradu heroico, Servi Dei Romani

Bottegal, Sacerdotis Professi Ordinis Cisterciensium Strictioris Observantiae

et Eremitae, in casu et ad effectum de quo agitur.