Acta Apostolicae Sedis - Commentarium Officiale516

illa, magna cum simplicitate, omnibus respondebat, ut quondam dixerat:

« Expleo id quod mihi Beata Virgo Maria dicit et nihil magis », candide adiun-

gens: « Ego precor et Beata Virgo Maria audit me et respondet mihi » vel

« Spiritus dat mihi consilium ».

Frater eius, mortuus anno 1862, illam omnium bonorum suorum heredem

designavit. Copiosa illa hereditate Serva Dei beneficas operas auxit, inter

quas aedificationem parvae ecclesiae Immaculatae Conceptioni dicatae,

quam Beata Virgine inspirante efficere voluit, tanti incepti participes faciens

omnes qui eam frequentabant.

Die 8 mensis Iulii anno 1888 necessitatem percepit se omnibus bonis

exuendi quae uti heres possidebat, dictans testamentum in quo bona sua

Paroeciae reliquit et sollicite curavit ut monitum daret de omnibus quae

vendenda et largienda pauperibus essent.

Spiritualitas Servae Dei maxime evangelica virtute emicuit, quoniam

solum amori Dei et proximi est innisa, qui provenit ex simplici natura eius,

sine ulla docta aut speculativa indole.

Nhá Chica die 12 mensis Iunii anno 1895, meritis ornata, mortua est.

Corpus eius in ecclesia matre vici Baependi occurrentibus per quattuor dies

expositum est, nullum signum dissolutionis ostendens: sic plurimis fidelibus

concessum est ut ultimam salutationem ei facerent. Deinde in aedicula ab illa

aedificata corpus sepultum est.

Causa, ad eam in Sanctorum numerum referendam, instructa est ob

sanctitatis continuam et crescentem famam: Inquisitio dioecesana a die 10

mensis Octobris anno 1993 ad diem 31 mensis Maii anno 1995 apud Curiam

Episcopalem Campaniensem in Brasilia instituta est, inde anno 1998 oppor-

tunum addere reputatum est Instructoriam Suppletivam, quarum validitas

et vis iuridica a Congregatione de Causis Sanctorum Decreto diei 12 mensis

Martii anno 1999 probatae sunt. Cum Causa antiqua esset, Positio primum in

Congressu Consultorum Historicorum disputata est die 30 mensis Octobris

anno 2001 et inde die 8 mensis Iunii anno 2010 in Congressu Peculiari

Consultorum Theologorum. Patres Cardinales et Episcopi in Sessione Ordi-

naria diei 11 mensis Ianuarii anno 2011, audita relatione Causae Ponentis,

Exc.mi D.ni Laurentii Chiarinelli, Episcopi emeriti Viterbiensis, professi

sunt Servam Dei virtutes theologales et cardinales iisque adnexas in gradu

heroico coluisse.

Facta demum de hisce omnibus rebus Summo Pontifici Benedicto XVI

per subscriptum Cardinalem Praefectum accurata relatione, Sanctitas Sua,