326. (3. ) Sequentia de Sancta Maria.

1. 0 virga ac diadema purpurae regis, quae es in clausura tua sicut lorica.

2. Tu frondens floruisti in alia vicissitudine, quam Adam omne genus humanum produceret.

3. Ave, ave, de tuo ventre alia vita processit, qua Adam filios suos denudaverat.

4. 0 flos, tu non germinasti de rore nec de guttis pluviae, nec aer desuper te volavit, sed divina claritas in nobilissima virga te produxit.

5. 0 virga, floriditatem tuam Deus in prima die creaturae suae praeviderat.

6. Et de verbo suo auream materiam, o laudabilis virgo, fecit.

7. 0 quam magnum est in viribus suis latus viri, de quo Deus formam mulieris produxit, quam fecit speculum omnis ornamenti sui et amplexionem omnis creaturae suae!

8. Inde concinunt caelestia organa et miratur omnis terra, o laudabilis Maria, quia Deus te valde amavit. Quam valde plangendum et lugendum est, quod tristitia in crimine per consilium serpentis in mulierem fluxit.

9. Nam ipsa mulier, quam Deus matrem omnium posuit, viscera sua cum mulieribus ignorantiae decerpsit et plenum dolorem generi suo protulit.

10. Sed, o aurora, de ventre tuo novus sol processit, qui omnia crimina Evae abstersit et maiorem benedictionem per te protulit, quam Eva hominibus nocuisset.

11. Unde, o salvatrix, quae novum lumen humano generi protulisti, collige membra filii tui ad caelestem harmoniam.