198. (11. ) In Susceptione Reliquiarum Sancti Magni.

R. Miles, ad castrum properes novellum Pridem et notos repetas locellos, Posside terram tibi praeparatam, Iam comes Galli, sociare illi.

Nos sua, Magne, Pignora Gallus Miserat ad te Teque venire Oppido poscit.

2. Nunc studet ille Rus laquearque Te veniente Comere laute, Nil remoreris.

3. Sexus uterque, Vir mulierque, Turba pedestris, Coetus equestris Vociferantur.

4. Te, pater, aetas Expetit omnis, Ut veniendo Cuncta mederis Et modulantur.

5. Quando parata Ingrediaris Tecta, patrone, Nos famulantes Ipse tuere.

6. Ad tua quisque Limina stratus Te sibi poscat, Sancte, favere; Esto misertus.

7. Igne nocivo, Grandine, morbo Daemonis astu, Marte fameque Protege cives,

8. Corporis ut qui Reliquiarum Condere partem Promeruerunt, Iuveris illos.