188. (1. ) Versus Hartmanni ante Evangelium cantandi.

1. Sacrata libri dogmata Portantur evangelici, Cunctis stupenda gentibus Et praeferenda laudibus.

2. Mundemus omnes corpora Sensusque cordis simplici Purgantes conscientia Verba pensemus mystica.

3. Vultus declini pariter Clausa tenentes stomata Stemus intentis auribus, Ut decet, ante Dominum.

4. Nec sat videtur sonitus Auditu solo capere, Ni cor purgatum teneat Factisque iussa compleat.

5. Sic mandat ipse maximus Magister, summi filius, Sensus nostrorum pectorum Arvis diversis comparans.

6. Sunt, ait, rura plurima, Quis semen frugis spargitur, Censu sed multum dispari Reddunt accepta foenora.

7. Quaedam saxorum stramine Replentur nimis pessimo, Frugemque necat maximus Ardor solaris luminis.

8. Quaedam siccato germine Replentur spinis horridis, Viarum strata plurimis Officiunt seminibus.

9. Ast qui felices fertili Glebas fecundat germine, Illum laetantem cumulat Fructus laboris centuplex.

10. Sic voluntatis integrae Perfecta nitent opera, Terraque cordis optimi Centenum refert numerum.