196. (9. ) In Susceptione Reliquiarum sancti Magni.

1. Christus ad nostras veniat camenas, Christus et vocem tribuat salubrem, Christus ad vitam vehat et perennem Se modulantes.

2. Audiat nosmet chorus angelorum, Protegat nos plebs et apostolorum, Patriarchae omnes simul et prophetae Luce perenni.

3. Martyrum turbas petimus serenas, Sanguinis palma pretioque claras, Vocis ut nostrae modulis receptis Gaudia praestent.

4. Nunc sacerdotes monachosque claros Ad preces nostras cupidi vocamus, Nosmet ut semper foveant et nostra Pace suavi.

5. Virginum dulces nitidosque flores Semper in nostro petimus favore Esse praesentes simul et fugantes Noxia quaeque.

6. Omnium sane rutilus piorum

Coetus ad nostram vigilet salutem, Invidum pellens rapidumque furem Munere Christi.

7. Christe, nunc servos miserare fidos Ob precem sanctae nitidaeque plebis, Inter hos Magni meritum recordans, Maxime iudex.

8. Per Crucem sanctam moderare nostram, Conditor, vitam tribuens quietam, Perditis culpa veniam rependens, Luminis auctor.

9. Pacis augmentum tribuas, rogamus, Utque salvemur, pariter precamur, Ac remittendi decus exhiberi Te miserante.

10. Aetheris blandos facilesque motus Frugis et largos remeare quaestus, Regibus vitam populisque pacem Da, pater orbis.

11. Praesuli nostro dominans faveto

Huicque caelestem tribuens honorem Posthumum Petri facito perenni Laude beatri.

12. Agne, qui tollis facinus reorum, Conditor lucis, miserere nobis, Christe, nos audi, patris alme fili, Kyrie, eleison.

Nach Str. 1 schiebt C ein:

Virginum virgo meritis Maria Atque cum choris Michaei novenis Digni cum dignis precibus Iohannis (Iohannes Hs. ) Ferte iuvamen.