190. (3. ) Item eiusdem de eadem Festivitate.

1. Cum natus esset Dominus, Turbatur rex incredulus, Magi tulerunt munera, Quos stella duxit praevia.

2. Herodes rex interrogat, Quo Christus nasci debeat, Locumque dici flagitat, Ut hunc necare valeat.

3. Adorant magi Dominum Viamque carpunt aliam, Nec saevi regis impiam Ultra vident praesentiam.

4. Tunc rex Herodes fervida Succenditur insania Mandatque sterni milia Lactantium innumera.

5. Completur saeva iussio, Mactatur omnis pusio, Aetatis bimae parvuli Vel infra subduntur neci.

6. Mas omnis infans occidit, Quem novus partus protulit, Scrutatur, ah! cunabula Ac ipsa matrum ubera.

7. Quid furis, crudelissime 0 carnifex et pessime? Hic solus, qui requiritur, Impune Christus tollitur.

8. Pectus tenellum rumpitur, Matrum sinus perfunditur, Sed lactis plus quam sanguinis De loco stillat vulneris.

9. Salve, lactans exercitus, Flores sanctorum martyrum, Ad aram summi numinis Qui laeti semper luditis.

10. Nos vos laudantes pueros Semper iuvate precibus, Vobiscum uti jugiter Possimus laeti psallere.