4. De calore.

Calidum autem duplex est, scilicet solis elevando omnem vaporem, et loci calidum disgregando vel inflammando elevatum. Dico autem calidum solis esse prout sufficit nunc proposito nostro duplex, scilicet adurens, et evocans. Adurens autem est duabus de causis, quarum una est directa suppositio, vel fere directa sole existente in signis aestivalibus, praecipue circa tropicum aestivalem, ut sunt Gemini, Cancer, Leo, Virgo. Tunc enim radii sui in directo suppositis regionibus incidunt in illas ad modum perpeiidiculi cadentis de centro Solis, et restringuntur in seipsos, et efficiuntur infiniti, et conducunt in terra calorem adurentem. Et tunc nihil spirat in locis illis de terra, sed totum aduritur antequam elevetur. In locis autem vicinis quae per latitudinem magis accedunt ad Aquilonem, quanto plus recedunt a via solis, tanto plus ohlique recipiunt, et anguli radiorum magis ampliantur : et minor proinde fit calor et minus ardens et magis evocans spiramen evaporationis. Et sic secundum latitudinem omnium climatum a via Solis vel aequinoctialis facile est accipere proportionem caloris plus vel minus adurentis.