Acta Apostolicae Sedis - Commentarium Officiale286

ACTA CONGREGATIONUM

CONGREGATIO DE CAUSIS SANCTORUM

LABACEN.

Beatificationis et Canonizationis Servi Dei Ioannis Francisci Gnidovec, Episcopi

Scopiensis (1873-1939)

DECRETUM SUPER VIRTUTIBUS

« Eritis mihi testes... usque ad ultimum terrae » (Act 1, 8).

Haec, quae Dominus Iesus affirmavit, haud dubium est quin Ioannes

Franciscus Gnidovec, Vincentianus sodalis, Scopiensis Episcopus, per vitam

suam fideliter repraesentarit; namque illud « Omnibus omnia factus », quod

ipse titulum sui episcopalis muneris sumpserat, clarissimo testimonio est eum

omnem vitam suam pro fratribus prodegisse.

Hic Famulus Dei, in pago, quem vulgo Veliki Lipovec appellant, in Slo-

venia, die 29 mensis Septembris anno 1873, natus, puer septem annorum

matre orbatus est (haec enim, dum quintum natu infantem in lucem ederet,

perierat); quam ipse in reliquum vitae tempus cum sibi ademptam usque

defleret, tamen insignem, qua eadem praedita erat, pietatem veluti heredi-

tate accepit. Litterarum primordiis imbutus est primum in loco, ubi genitus

erat, deinde vero in ludo fratrum Franciscalium, in urbe quam vocant Novo

Mesto, ibique deinceps in Gymnasium atque in Lyceum itavit. Cum autem

sub idem tempus pater quoque decessisset, Ioannes, qui interea sese divinitus

ad sacra capessenda munia vocatum iampridem agnoverat, maturitatis ex-

perimento probatus, in Seminarium Labacense, ad exercenda theologiae stu-

dia, ingressus est; ibique etiam Vincentianos sodales cognovit, qui eum in

suam sodalitatem post multos annos cooptaturi erant. Sacram denique ordi-

nationem recepit die 23 mensis Iulii anno 1896, nondum viginti tres annos

natus adulescens, in aede principe Labacensi.