379. (8. ) Laudes Studii.

1. Concinat laetas lyra mentis odas, Voxque sit laetae comes aequa menti, His opus firmo sociare cantor Foedere temptet.

2. Dic Deo foris modulos placentes, Lacrimis summo modulare duci, Per preces temptes penetrare caelum Tramite stricto.

3. Ut viam discant, fugiant scholares Deditos carni vitiique servos, Semper insistant operi venusto, Seria quaerant.

4. Me iuvat laudes studii levare, Fonte nos cuius Dea sacra potat, Quae reservatrix Heliconis aufert Nectaris haustum.

5. Cuius exhausit Nicolaus undam Et bibit plene Katherina potum Et salutaris sitiebat aquae Pocula Paulus.

6. Non onus fortes retrahit catervas, Lucta sed dulcem revehit quietem, His labor ludum sapit et voluntas Robur adauget.

7. Vita florescit speciosa cleri,

Pulchra Pallas si comitatur illum, Et fugit Cypris, fugit et gementis Planctus avari.

8. Non dolo fallax aliena raptat,

Dives est, quando nihil est in arca, Poculum dicit fluviale Bacchum Parvula laudans.

9. Unus in dignam cathedram levatur, Claustra gratatur reliquus tenere, Alter in densis eremita silvis Pascitur herbis.

10. Hic oves pascit dape spiritali, His facit vitae scaturire fontem, Hic studet turbam studii rigare Fonte Minervae.