375. (4. ) De beata Maria Virgine.

1 a. Virgo mater salvatoris, Stella maris, stilla roris, Et cella dulcedinis,

1 b. Da spiramen veri floris, Florem fructus et odoris, Fructum fortitudinis.

2 a. In hoc mari sis solamen

Nobis, cymba, dux, tutamen, Remex, aura, statio,

2 b. Aura perfles in hoc mari, Quae praefulges singulari Semper igne praevio.

3 a. Haec est arca Noe viva,

Haec columba cum oliva,

Haec est pacis nuntia,

3 b. Haec est Sara nobis ridens, Sibi risum dari videns Isaac ex gratia.

4 a. Dat Rebecca luctatorem, Rachel Ioseph provisorem In Aegypti finibus;

4 b. Haec est via rubro mari, Per quam viam naufragari Nequis mundi fluctibus.

5 a. Haec post mare trympanizat, Haec Sauli citharizat David mundo pariens;

5 b. Haec est David Sunamitis, Casto thoro casta, mitis, Thorum viri nesciens.

6 a. Ruth in agro spicas legit, Booz sponsam hanc elegit Salutaris nuntius,

6 b. Haec Susanna, quam accusat Nunc Iudaeus et incusat Fraudis fictae conscius.

7 a. Raguelis haec est nata, 0 Tobia, tibi data Servata coniugio,

7 b. Esther uxor haec Assueri, Per quam Aman contorqueri Meruit suspendio.

8 a. Holofernem Iudith stravit, Iahel clavo perforavit Te fugacem, Sisara;

8 b. Haec est palmae nuntiatrix, Haec sub palma iudicatrix Manu forti Delbora.

9 a. Semper lucens est lucerna, Extra Bethlehem cisterna, Quam rex David sitiit;

9 b. Manna Gomor adimpletur, Quo plebs Christi satietur, Diu quod esuriit.

10 a. Parturit ex Elcana

Tandem Anna filium, Spes Saulis orphana, Quo ius perdit regium.

10 b. Samuelem parturit

Quo pastor inungitur, Rex austerus deperit, Et puer extollitur.

11a. Haec regina veniens

Ab Austernis finibus, A stupendo rediens Salomonis dotibus.

11b. Terra plaudit fontibus Helim duodenis Et palmis virentibus Decies septenis.

12 a. Isti sunt apostoli Fontes duodeni

12 b. Et palmae discipuli Decies septeni.

13 a. Quid intrico tot scripturas Et extrico tot figuras? Haec est nobis omnia.

13 b. Haec est decus virginale Et exemplum speciale Mulierum gratia.