372. (1. ) De Conceptione beatae Mariae.

Hymnus Primus.

1. Rerum frena tenens conditor omnium, Portus naufragii, dextra natantium, De stella rutilans sol sine motibus, Nobis surge cadentibus.

2. Virtus omnipotens, vera scientia, Perdurans bonitas, omnibus omnia, Stellam mitte tuam nocte viantibus, Quae sit dux, via gressibus.

3. Floris principio prata virentia Dant risum genito flore recentia, Gaudet mater humus, gaudet et incola Concepta sibi vermula.

4. Matris, Christe, tuae festa colentibus Purgatis tribuas aethera sordibus, Laetum redde diem, quo rosa gignitur, Flos florum tibi pingitur.

5. Promissam canimus laude prophetica, Quae lux est miseris stellaque nautica, Lucis principium mox colit infima, Ne nox luce sit ultima.

6. Udam fons hodie dulcis humum facit. Granum laetitiae cultor humi iacit, Phoenix concipitur lapsis et unica Lampas scalaque caelica.

7. Mundi, Christe, salus veraque physica, Falli vulneribus nescia practica, Conceptae meritis pectoris ulcera Mundes, qui regis aethera.