376. (5. ) De sancta Katharina.

1 a. Vita nobis exemplaris, Vita tota militaris Katharinae floruit.

1 b. Virgo, gemma virginalis, Norma vitae triumphalis, Nos pugnare docuit.

2 a. Flos est soli Pelopaei Katharina, sponsa Dei, Costi regis filia,

2 b. Flos in bruma plus vernavit, Idolatras dum perflavit Congelans malitia.

3a. Nescit pudicitiae

Sigillum confringere,

3 b. Nescit immunditiae

Blandimentis cedere.

4 a. In tristi laetitia, Amica saevitia Iucundari negligit,

4 b. Sed dulce naufragium, Mellitum absynthium Dedignanter abigit.

5 a. Nam ut fuit morti parens Virginis uterque parens, Caeli crevit pluvia,

5 b. Dum in patris tectis manet, In tyranno bruma canet, Surgit flos audacia.

6 a. Flos pruinam reprehendit, Argumentis ad hoc tendit, Vernet ut iustitia,

6 b. Quinquaginta viri docti Sunt conversi, flammis cocti Pro vitali gloria.

7 a. Est illaesa coma, vestis, Rosam gravis artat restis, Est et flecti nescia;

7 b. Rosa, heus, incarceratur, Hanc regina consolatur, Porphyrii socia.

8 a. Nutrit rosam sol de caelo Et illustrat sacro zelo, Tormentorum ut in prelo Rideat victoria.

8 b. Angelus hanc consolatur, Nix regina roseatur Tam decenter et ornatur Morum per crinalia.

9 a. Rosa flagris flagellatur Et plus trita decoratur Rotis, clavis media;

9 b. Rotas has Crasates fecit, Angelus rotas deiecit Quattuor sternens milia.

10 a. Rosa vernat inoffensa, Sed regina laude pensa Trans mamillas est suspensa Fixa per hastilia.

10 b. Christi miles gloriatur, Cum ducentis laureatur.. Est eductus, ut caedatur Flos ab Alexandria.

11a. Vox oranti favet Dei,

Quod, qui laude servit ei, Quae vult, sumat praemia.

11b. Lac est fusum pro cruore Et caelorum flos odore Spirat in sublimia.

12 a. Haec in monte novo more Est delata cum canore A caelesti curia;

12 b. Oleum de tumba manat, Morbos omnes fide sanat, Flos nos sanet venia.