426. De sancta Ursula.

la. Plantans rigat Britannia,

Sed germinans Germania

Subducit incrementum:

1b. Flores sunt in Colonia,
Sed fructus est in patria
Tot virginum prudentum.

2 a. Mors virginum tot milium
Cum rosa jungit lilium,
Rachelem jungit Liae,

2 b. Nicolaum Vincentio,

Martinum cum Laurentio,
Jesum jungit Mariae.

3 a. Stirps regia ad surculum
Suplex adspirat masculum,
Dum prodit virens virgula,
Viribus in virguncula
Felicius donatur.

3 b. Ursi rapacis aemula
Nomen sortitur Ursula,
In ursum crescens zabulum
Ex urso fecit ursulum,
Ut ex fine probatur.

4 a. A rege nuptum petitur,
Sed regum rex consulitur,
Spe non abscissa regulo
Regi servatur, anulo
Coelesti subarratur.

4 b. Quaeruntur per triennium
Sponsae greges sodalium,
Regina fit denario
Monas sub undenario
Millenis aggregatur.

5 a. Fit navalis fabrica

Singulis millenis,
Proelii praenostica

Spectatur arenis,
Praeponuntur coelica

Regulis terrenis,
Salomonis cantica

Jeremiae threnis.

5 b. Finito praeludio

Virginalis belli
Dimicandi studio

Cupiunt divelli,
Lictoris a gremio

Quolibet propelli,
Quolibet supplicio

Pro Christo percelli.

6 a. Flante vento velo tendunt,
Maris terga in transcendunt,
Dum per Rhenum Romam
tendunt,
Applicant Coloniae.

6 b. Revelatur hic reginae,
Quam felici viae fine
Revertentes Agrippinae

Christi fient hostiae.

7 a. Rumor choris dat choream,
Navigator Basileam,
Dam transcurrunt apud eam,
Statio fit navium.

7b. Petro Paulo visitatis,
Sanctis rite perlustratis,
Papa Roma salutatis
Recurrunt ad bravium.

8 a. Jam ditatur Ophir auro
Classis Salomonica,
Redit tanto cum thesauro,
Gaudet urbs pacifica,

8 b. Tanta messe jam matura
Praeparatur horreum,
Falcem parat gens messura
Triticum virgineum.

9 a. Gens Hunnorum, genslupina,
Gens ferox, gens leonina,
Jam discurrens Agrippina
Cinxerat ovilia.

9b. Venit classis cum regina,
Cohors illa columbina
Praeda fit ancipitrina,
Convolat in retia.

10 a. Grex cossis cum foetibus
Gemellis raptatur,

Lictorum mucronibus
Lictore lictatur,

Non fuga nec precibus
Nec vi reluctatur.

10 b. Crimen erat violis
Nolle violari,

Ligustris, liliolis
Nolle deflorari,

Orthodoxis idolis
Nolle subjugari.

11a. Exstinctas tot acies

Sequitur regina,
Visa rosa rabies

Mutescit ferina,
Vernat floris species,

Obmutescit spina,
Supplicat barbaries,

Ut sit concubina.

11b. Tyrannus respuitur,

Virgo sagittator,
Lilium succiditur,

Rosa cruentatur,
Mortis fel ebibitur,

Totum consummatur,
Flatus coelo redditur,

Terra terrae datur.

12 a. Sola latebas, Cordula,

Mortem procrastinasti,
Tanto major per saecula
Triticum triumphasti.

12 b. Divinitus perterrita

Gens barbara fugatur,
Urbs liberatur inclita,
Gens martyrum humatur.

18 a. O messor quam falx aemula,
Messis quam fructuosa,
Dives ager, quo stipula
Jacet tam pretiosa.

13 b. O vestis absque macula,
Sponsa quam gloriosa,
Quot gaudia, quot oscula
Dilecti cum formosa.

14 a. Salve, bellatrix Ursula,
Martyr imperativa,
Cordata salve Cordula,
Martyrum subjunctiva;

14b. Quis nomina per singula
Discurrat fugitiva,
Coelo vivunt in saecula,
Stans laus intransitiva.

15 a. Laetare jam, Britannia,
Quae plantas protulisti,
Jam plaude tu, Germania,
Quae vitam transtulisti.

15 b. Tripudia, Colonia,

Quae flores collegisti,
Nam jubilant coelestia
De tanto fructu Christi.