263. (9. ) De Omnibus Sanctis.

1. Gaudete, iusti, mites et pacifici, Et omnes recti corde gloriamini, Semper manentis possessores bravii, Filii Dei, conspectores Domini, Sic ordo sacri testatur eloquii.

2. In vobis quidem sanctus ille iugiter Spiritus pietatis, sapientiae Et intellectus, timoris, scientiae, Consilii, fortitudinis residet, Largiter satis unumquemque imbuens.

3. Inenarranda Domini est pietas, Qui tantum diligit corda humilia, Ut ea replens septiformi gratia Spiritus sui condat habitacula, Cuius est fructus gaudium, pax, caritas.

4. Sternit elata, fundit arrogantia, Brachio suo conterit praelustria, Sic quondam summa redimitum gloria Pro sola tantum angelum superbia Felicitate reppulit perpetua.

5. Qui tam formosus et decorus exstitit, Ut nihil intra paradisum Domini Aequari posset eius pulchritudini, Platani, cedri, vertex et abietis Fondibus eius non fuit aequabilis.

6. Similitudinis Dei signaculum Erat decoris specie praenimius, Cuius in veste fulserat carbunculus, Sapphirus, iaspis, sardius, chrysolithus, Smaragdus, onyx, beryllus, topazius.

7. Infelix homo, qui, cum superbierit Elationis crimine, passurus sit, Si iustus iudex veniam non tribuit, Qui claritatis tantae lumen intulit, Ut rite cunctis praeferetur angelis.

8. Sed felix ille, quem res istae possident: Mens bona, pectus purum, vita innocens, Cuius in caelo merces orbe maior est, Et nomen ille magnus liber continet, Quem ante tempus scripserat omnipotens.

9. Illic divinae pietatis munere

Vos, Oderisi, tu, Dinetras mundule, Conscripti vitae fulgitis caractere; Apostolorum chorus hinc et martyres Et confessores exsultant ac virgines.

10. Postquam finita statione saeculi

Vos scriptor idem antiquus citaverit, Caelorum regni claviger mox aperit, Regis aeterni virgo mater excipit Et statim choris sociat angelicis.

11. Sanctorum omnis concinit exercitus, Iubal est primus in choro canentium, Pulsat Maria, soror Aaron, tympanum, Rex autem David personat psalterium Et Benedictus regulare praemium.

12. Cernit insignes legis sui dogmate Inter ignitos et condensos lapides Nitore miro coruscare pariter, Miratur opus et laudat artificem, Inde scholarem rimatur originem.

13. Accedit Maurus, Honoratus, Placidus, Et Constantinus, Faustus et Simplicius, Beato Patri omnes ita referunt: Quos sic miraris, ex Casino prodeunt; Hos expolivit noster Desiderius.

14. Cui pater almus grates fert innumeras Eique digna praemia pronuntiat, Auctorem rerum omnium expostulat, Ut in superna angelorum gloria Sibi cum illo congaudere liceat.

15. Inter haec vobis Seraphim micantia

Sanctus et sanctus, sanctus proclamantia Inaestimanda conferunt tripudia, Canere iubent canticorum cantica, Ut illa quater triginta sex milia.

16. Citharizantes cantico virgineo Decenter agno psallitis purpureo, Laudatis eum in choro et tympano, Cantatis ei in chordis et organo, Caeli terraeque iubilatis Domino.

17. Cuius effecti gloriae participes,

Iam, precor, sitis mei semper memores, Sic eum mihi facite placabilem, Ut me dignetur superis coniungere, Unde vos possim vel longe respicere.