84. Hymnus alius ad eadem.

1. Cave, non sis tu gulosus,
A gula te abstineas,
Homo hic pernitiosus,
Sis abstinens, contineas,
Gula venit quis dolosus
Domos perdens ac vineas.

2. Non veneretur ebrius,
Si faceret miracula,
Et nec honoretur eius
In aliquo memoria,
Nam gerit ipse vilius,
Qui laeditur per pocula.

3. Honeste cura vivere,
Virtutibus adhaereas,
Tu mala velis spernere
Deumque ama, timeas,
Tu fratrem noli laedere
Ipsumque corde diligas.

4. Luxuriam tu fugito
Et non esto fornicator,
Hic confundetur subito
Revolvens se[se] peccator,
Hic corruet, non dubito,
Erit sui dissipator.

5. Quid prospicis, te allevas,
Quid laetaris tu mundanis?
Quid adversis te perturbas,
Quid tristaris rebus vanis?
Quid verum non tu cogitas,
Quid tu non adhaeres sanis.

6. Quid redis tu ad vomitum
Iam reiterans peccatum?
Respicias tu exitum
Et reducas te purgatum,
Recupera te perditum
Et te reddas Deo gratum.

7. Si ad Deum tuum redis
Et te reducis devium,
Certus es, quod tu non peris,
Non claudit Deus gremium,
Sanctus es, si Deum quaeris,
Dat tibi bonum praemium.

8. Nam qui adhaeret vitiis
Recedens a virtutibus,
Plorabit ex deliciis
Stans in obscuris nubibus,
Gravabitur tristitiis
In multis poenis gravibus.

9. Cum peccata congeruntur
Fundantque ipsa radices,
Si non certe repelluntur,
Sunt peccantes infelices ;
Ipsi autem corriguntur,
Erunt ipsi iam felices.

10. Cave, (non) secundo ligeris,
Tu in Deum nec insurgas,
Non evades, punieris,
Si confestim non repurgas,
In peccato non moreris,
Sed ad Deum te reducas.