21. Hymnus de eodem.

1. Sacramentum veneremur
Hoc summum nos amantes,
Sibi omnes subiugemur,
Illud digni nos gustantes
Nos ab eo disgregemur,
Illud simus nos sectantes,
Eius semper memoremur,
Simus corde prosequentes,
In hoc cuncti delectemur,
Simul mixtim lacrimantes
Ac in Christo recreemur,
Mentem nostram reformantes,
Ut per ipsum gubernemur,
Nos virtutes confortantes.

2. Ex eo sacratissimo
Lacrimantes exsultemus,
Ex ipso clementissimo
Nos dolendo iubilemus
In eoque dulcissimo
Nos digne [nos] recreemus,
Nam sit commemoratio,
Esse memores debemus,
In nobis sit confessio,
Nos contriti adoremus ;
Cunctorum est defensio,
Nos per ipsum obtinemus,
Peccatorum est remissio,
Nam in caelo nos vivemus.

3. Hunc cibum [is] qui manducat
Digne sanguinemque bibit,
Actus est, ut quem reducat
Hic ad locum, unde venit,
Datus est, ut nos conducat
Hic ad vitam, quam concedit,
Constans manet, semper durat,
Sacramentum nunquam perit,
Nos confortat seu curat,
Cuncta malaque delevit ;
Tristis homo, qui periurat
Contra ipsum vel recedit,
Quod non quaerit, se obscurat,
Credat, se quod iam defecit.