31. Dicit Deus homini.

1. Ego iudex, actor, testis,
Cum venerit iudicium,
Nam in throno sum a dextris,
Qui faciam officium,
Dies irae, dies pestis,
Cum dabitur supplicium.

2. Non claudo tibi gremium,
Iam si cupis tu redire,
Tibi certe do praemium,
Si tu cupis oboedire,
Nam te reducam devium,
Si non amas te perire.

3. Tu [nam] mea es imago
Et factus mihi similis,
Appellaris tu virago,
In mundo agis nobilis,
Ego te baccis molabo,
Sis mihi tu amabilis.

4. Mei Dei tu memento,
A me factus nam fuisti,
Et te salvo in momento,
Si te ipsum correxisti,
Te artabo monumento,
Si ad me non rediisti.

5. Ego quaero cor contritum
Et cor humile non sperno,
Si peccasses infinitum,
Liberabo ab inferno
Paenitentia munitum,
Quem salvari dico, cerno.

6. Mea misericordia

Manet maior quam natura,
Est maior mea venia
Quam humana creatura,
Si sunt contrita cordia,
Iam non erunt in pressura.

7. Nam laetor, nimis gaudeo,
Cum filius reducitur,
Nam eius vocem audio,
Cum hic per me conducitur,
Exsulto cantu nimio,
Cum homo mihi redditur.

8. Fulciaris sacramentis
Mea deferens tu arma,
Sis ornatus vestimentis,
Acceptaberis cum. palma,
Sis in albis paramentis,
Dicas Sanctus et Hosanna.

9. Sum vita, via, veritas,
Hominibus compatiens,
Sum fides, spesque caritas,
Sum gentibusque miserens,
Sol, luna, stella, claritas,
Dispono, tollo tribuens.

10. Sum omnia prospiciens
Et sum intellegentia,
Sum in excelsis sapiens,
Sum maxima potentia,
Sum lumen indeficiens,
Sum virtus, patientia.

11. Qui noscere te negligis,
Feci te de terrae limo;
Quid tu servire desinis
Creatori mihi primo?
Si te non certe corrigis.
Tu artaberis sub fimo.

12. Sine me tu non fuisses,

Sine me tu nunquam vivis,

Sine me tu non regnasses,

Sine me tu male finis,

Sine me non salvus esses,

Sine me tu pulvis, cinis.

13. Me invocabis, annuam,

Sum te clamantem diligens ;
Tu quaeras me, te audiam,
Quod petis, sum iam tribuens ;
Si tu peccabis, arguam,
Te sis confestim corrigens.

14. In te ipso si confidis,
Despiciens consilium,
Si de aliis diffidis,
Spernens tu praesidium,
Tu non regnas , sed tu ruis
In damnumque periculum.