36. Dicunt homines Deo.

1. Verax Deus, Dominus,
Tenens tu dominium,
Rex tu, vita omnibus,
Rector, pastor ovium,
Diligat te populus,
Tuum est imperium.

2. Tu vita nobis, cantus
Suavisque dulcedo,
Tu odor nobis quantus,
Tu summa sanctitudo,
Tu tollis nobis planctus,
Tu virtus, pulchritudo.

3. Tu nobis luxque lumen
Nostrumque solacium,
Tu nostrum confortamen
Donans longum spatium,
Tu nostrum pellis crimen
Ferens nobis gaudium.

4. Tibi honor, gloria,
Cantus, iubilatio,
Laus [et] reverentia,
Salus, benedictio,
Preces, pax, victoria,
Odorque tributio.

5. Tu excelsum brachium,
Terris, regnis dominans,
Non extendis gladium,
Quia pius mitigans,
Da perenne gaudium
Corda nostra luminans.

6. Deus tu sanctissimus,
Facis mirabilia,
Solus tu sanctissimus,
(Qui) facis terribilia,
Solus clementissimus,
Facis amabilia.

7. Hymnum tibi canimus
Timore servientes,
Tibi cantum facimus
Tremore exsultantes,
Gratias nos agimus
Amore te timentes.

8. Creator tu cunctorum,
Omnes tu vivificans,
Nutritor es vivorum,
Homines mortificans,
(Tu) salvator mortuorum,
Ipsos tu vivificans,

9. Caeli, terrae iubilent,
Tibi cantus faciant,
Hi servire praeparent,
Tibi Deo pareant,
Hi subesse vigilent,
Te amore timeant.

10. Sono peramabili

Hymnum tibi canimus,
Voce incessabili
Tibi Sanctus dicimus
Tibique mirabili
Gratias nos agimus.

11. Serviamus principi
Tibi potentissimo,
Non. valemus decipi,
Erimus in gaudio,
Qui non cupit proici,
Placeat altissimo.

12. Nos vocibus clamamus
Ad te devoti, Deus,
Ad portam nos pulsamus,
Nos audi, custos verus,
Videre te optamus,
Qui es amore plenus.

13. Summa tu nobilitas,
Tu actus ad parcendum,
Totus es benignitas,
Tu praebes ad gaudendum,
Tu donum ac largitas,
Tu confers ad vivendum.

14. Tu princeps, rex caelestis,
Tu cunctorum Dominus,
Tu pater, iudex, testis,
Cognitor de omnibus,
Tu creas, nutris, vestis,
Tu saturas panibus.

15. Tu pascis cunctas oves
Custodisque conducis,
Tu super omnes potes,
Tu salvasque reducis,
Tu terram [quo]que moves,
Tu es largitor lucis.

16. Deus, ne nos deseras,
Sed custodi, protege,
Nostras pelle tenebras,
Hostem nostrum comprime,
Nobis tu indulgeas,
Nos dispone veniae.