406. De sancto Philiberto.
Ad Vesperas.

1. Festa praeelari rutilant diei,
Qua poli claram Philibertus aulam
Scandit adjunctus niveis choreis
Carnea linquens.

2. Pastor hic omni venerandus orbi,
Lustra percurrens juvenis quaterna,
Praebuit Christi penitus benignis
Vocibus aurem.
3. Hinc lares dulces, patriam, parentes
Regis aeterni fugiens amore
Sub jugo levi Domini tonantis
Comprimit artus.
4. Hostis antiquus machinas crudelis
In tribus temptans reparat beato,
Sed crucis saevam repulit sereno
Stigmate larvam.
5. Mira qui multis decorata gestis

Templa construxit, quibus almus ordo
Coenobitarum Domino devotus
Redderet odas.
6. Corporum morbos variosque pellit,
Daemonis cedunt truculenta sancto,
Laetus ad votum rediit ab eo
Languidus omnis.
7. O patrum splendens, Philiberte, gemma,
Te piis cuncti lacrimis precamur,
Nostra disrumpe, quibus aggravamur,
Vincula mortis.
8. Qui tuis dignam meritis coronam
Obtines laetus, tribue perennem
A pio nobis Dominoque Jesu
Tradere vitam.
9. Praestet hoc nobis genitor perennis,
Natus et flamen, dominator orbis,
Par quibus exstat honor atque regnum
Omne per aevum.