52. In perennis diem Sabbati.

1. Alma fulget in coelesti
perpes regno civitas
Hierusalem, quae est nostrum
celsa mater omnium.
2. Bonis dignam quam creavit
rex aeternus patriam,
Malis absque qua felices
fine nullo gaudeant.

3. Cujus multae mansiones
amplis insunt moenibus,
Namque suam quisque sedem
sumit factis congruam.
4. De communi sed vicissim
consolantur praemio,
Unus sacros inter muros
amor quos complectitur.

5. Excellentes immortali
statu coetus hominum
Angelorum mixti choris
laudem Christo concinunt.

6. Fide clarum patriarchae
comitantur Abraham
Deque sua stirpe nato
vota solvunt Domino.

7. Gaudens regem tenebrarum
victum canit legifer,
Promissumque olim suis
pandit regnum populis.
8. Hunc secuta prophetarum
ibi cernunt agmina,
Vitae nobis quam venturae
praecinebant gloriam.

9. Illic et apostolorum
sacer adest numerus,
Urbis celsa qui credenti
portas plebi reserant.

10. Karmen Christo triumphale
cantat chorus martyrum,
Quanto plura passus istic,
illic tanto laetior.
11. Laudem dicunt et adorant
viventem per saecula,
Suas mittunt et coronas
ante thronum aureas.
12. Mater ibi tua, Jesu,

turmas ducens virginum
Locum tenet intra laetae
muros urbis optimum.
13. Novum melosque te coram,
nullus alter quod valet,
Modulatur agmen sacri
stolis cleri candidis.
14. Omnes ibi reges justi,
duces, plebes, milites,
Senes una juvenesque
laudant nomen Domini.

15. Puellarum cohors felix,
matres simul et piae,
Sponsi gaudent in amplexu
taedis comptae lucidis.
16. Quas inducet rex in sua
sublimis cellaria
Ordinabit et in illis
caritatis copulam.
17. Rectos corde cunctos unum
perlustrabit gaudium,
Indistincta pro distinctis
sumunt actis praemia.

18. Solis nulla, nulla lunae

urbs egebit lampade,

Christus illam namque suo

totam lustrat lumine.

19. Templum ipsa nullum habet

manu factum civitas,

Ipse Deas hujus templum

est et agnus unicum.

20. Vitae sacra paradiso
vernat arbor medio,
Cujus uber jam beatos
alit finctus incolas.

21. eXultantes manifestam
Dei cernunt faciem,
Dant aequalem coaeternae
trinitati gloriam.
22. Ydri nulla pestis illic,
morti nullus est locus,
Salus edux ample totum
implet urbis ambitum.

23. Zona summae caritatis

circum totam plectitur,
Vera totam lustrat intus
Deus ipsa caritas.
24. Gloriosa Deo patri
dilectaque filio
Laus et honor et potestas,
una sancto spiritu.

25. Sicut erat ante cuncta
temporum principia,
Est et erit in aeterna
saeculorum saecula.