110. De Gaudiis BMV.
Ad Laudes.

1. Magnae dies laetitiae
Adest sacratae virginis,
Quam matris dat familiae
Consors paterni luminis.

2. Aurora lucis rutilat,
Veri solis praenuntia,
Matrique Dei jubilat
Aeterna coeli gloria.

3. Rerum creator optime,
Per matrem mundum visitas,
Nos a peccatis erue,
O lux, beata trinitas.

4. Impleta gaudent viscera
Nunc exsultantis populi
De virgine puerpera,
Jesu, salvator saeculi.

5. Exsultet coelum laudibus
In Mariae laetitia,
Cujus donentur precibus
Beata nobis gaudia.

III. De Gaudiis BMV.

Ad Vesperas.

1. Exsultet coelum laudibus,
Resultet terra gaudiis
Pro tam laetis rumoribus,
Pro Gabrielis nuntiis.

2. Virgo per aurem concipit
Obumbrata altissimo
Fortem, qui mundum eripit
A tyranno durissimo.

3. Gaudet virgo salutata
Per cognatam Elisabeth,
Per quam est magnificata
Et gaudium matris habet.

4. Gaudet, cum Christus nascitur
Et pastores adveniunt,
Videntes, quod involvitur
Pannis, qui vix sufficiunt.

5. Tria magorum munera
Adorantium filium
Post tam longa itinera
Virginis augent gaudium.

6. Dum in templo praesentatur
Simeoni prophetanti,
Gaudium accumulatur
Matri Deum bajulanti.

7. Regressis de exsilio
Mortuis persequentibus
Fit gaudii occasio
In Nazareth manentibus.

8. Mater tristis pro perdito
Nato tandem gratulatur
Inter doctores cognito,
Ubi legem meditatur.

9. Dum convivae Iactabantur
Aqua in vinum conversa,
Mariae jucundabantur
Viscera gaudio mersa.

10. Dum Christus turbam satiat
Et corruscat miraculis,
Quis hanc gaudere nesciat
Pro portentis tam patulis.

11. Gaudet mater, dum patitur
Vita pro triumpho mortis,
Dum resurgens revertitur
Victor et praedator fortis.

12. Quantum gaudet, dum ascendit
Scandens ad patris dexteram
Natus, qui nunquam offendit
Nec rem egit mortiferam.

13. Pro missione spiritus
In matrem et discipulos
Decet gaudere coelitus
Tam dominam quam servulos.

14. Gloria sit trinitati,

Quae assumpsit ad aethera
Matrem incontaminati
Regnantem super sidera.