sig. 48. Quomodo aqua distillatur duplici modo ?

Distillatio sic fit: Pone aquam quam volueris distillare in vas distillationis, et pone vas in cineres, ut supra, et distilla, et hoc fit caliditate et sinceritate. Si autem vis caliditate et humiditate distillare, pone aquam in vas, in quo cineres prius fuerint, sive in caldarium super fumum distillationis, et in ipsam aquam pone faenum, et desuper vitrum, et firma ne declinet ad aliquam partem, sed stet directe. Et summopere praecave, ne umquam frigidum vitrum ponas in aquam calidam, vel e contra : alioquin frangeretur, et amitteres laborem tuum. Et nota, quod quando vas vis excipere, debes permittere infrigidari cum aqua, facta distillatione. Hoc autem caveas in distillatione, ne aqua bulliat in distillatione. Et per hanc doctrinam distillationis omnes aquas reserva : hoc totum reserva quod sequens doctrina et forma ostendit.

Additio. Aqua corporum : Recipe calcem Solis aut Lunae, et salis armoniaci sublimati ana, et insimul contere super lapidem : deinde sublimetur a calce corporum sal armoniacus, et reitera septies, conterendo et sublimando : tunc pone super lapidem ad solvendum. Aliqui tamen antequam subliment, imbibunt materiam, et conterunt cum aqua boracis dissoluti : et hoc faciunt septies.

Ad corpora solvendum in aquam : Corpora calcinata tere cum ana salis armoniaci et calcis corticum ovorum : tunc pone in phiala vitri ad lentum ignem, donec totum sit una massa : infrigida, et frange phialam, deinde pulveriza, et pone pulverem in loco dissolutionis. Sic etiam possunt spiritus sublimati in aquam resolvi super marmor, vel in fimo eum saepe renovando. Si vero vis reducere in sua corpora, congela ad lentum ignem, et funde cum attincar. Aurum calcinatum cum sale, per acetum acidissimum solvitur in aquam rubeam.