252. (5. ) Item in Resurrectione Domini.

Vocibus altisonis Dominum laudemus in odis Caelestique melos regi dulces iubilemus, Per se, non actus, qui caelitus est caro factus Sub carnis fatis latitante typo deitatis. 5 [Dum] tegitur pannis mundis puerilibus annis, Illi fit cuna praesaepis mansio dura. [E]ius praeceptum miserans, qui fecit ineptum, Non inproviso nudum pulsum paradiso, Subditur egregie Ioseph matrique Mariae.

10 Se circumcidi patitur [ri]tu puerili, Sicut peccator in templo purificatur, Crimina delere qui scitur nostra valere. Sub ditione pari baptismi fonte lavari, Qui sibi servus erat, ab eo dignando volebat.

15 Fortis et, ut nostis, temptamina pertulit hostis, A nullo tactus lapidum refugit quoque iactus Sustinuitque famem plerumque sitis cruciamen Ac auditorum plantas lavit ipse suorum. Haec intus facta, quamvis vi corporis acta,

20 Non poterat sane deitas eius latitare. Verbo divino mutavit aquam cito vino, Orbatos visu vestivit luminis usu, Sanos reddebat leprosos, quosque videbat, Patres defunctos iubet ipse resurgere cunctos.

25 Omnes curabat, quos [a]quae vis debilitarat, Quos cruor impinxit, fluxus hos ipse restrinxit.

Panibus e quinque satiavit milia quinque, Ventos sedavit, mare ceu siccum peragravit, Linguas mutorum iussu verbi reseravit,

30 Aures surdorum sputo tactas reparavit, Febres morborum quartanas porro fugavit. Talia post signa, post haec signacula digna Sponte sua capitur, crucifigitur et sepelitur. Ast in morte sua sol subtrahitur quoque luna.

35 En, lux illius est nobis orta diei,

Quam fecit Dominus, typus aeternae requiei, In qua ceu fortis leo vicit debita mortis Atque suis visus est dilectis redivivus Post, primus primae peccanti primo Mariae,

40 Fratribus undenis post hac maerore repletis, Informans illos scripturas corde pusillos, Gentibus ut plane scirent illas reserare. Ecce, resurgentem sollenniter omnitenentem Laetitia multa laudant nascentia cuncta.

45 Cuncta carent luctu, segetes vernant modo fructu, Producit fiores varios ex more colores De terra late tersa nivis asperitate. Carmina nunc plena dulcedine dat philomena, Nunc sol et luna perlucent clarius una,

50 Herbarum vellus producit florida tellus. Ergo die, fratres, hac exsultemus alacres, Instat quae fulgens, in qua de morte resurgens Mundi salvator, verus vitae reparator, Caelestis nobis patefecit iter regionis.

55 Totus iucundus sit per pia gaudia mundus, Coniubilent sancti simul Alleluia tonanti.