403. (5. ) De sancto Udalrico.

Officium.

In 1. Vesperis.

Antiphonae.

1. Ad Odelrici praesulis Festum concurrant populi, Hunc honorent cum gaudio Magni, maiores, parvuli.

2. In sancti monasterio Galli docendus traditur Odelricus, qui moribus, Scientia imbuitur.

3. Odelricus sublimatus Ad pastoris dignitatem Est in caelis coronatus Propter suam sanctitatem.

4. Odelricus ecclesias Collapsas reaedificat Et studio pervigili Has renovans magnificat.

5. Religiosa mulier

Aegris membris dissoluta Est Odelrici precibus Sanitati restituta.

Ad Magnificat.

A. Magnificemus Dominum Magnificum per omnia, Qui Odelricum praesulem Sua magnificentia Magnifice magnificat In supernorum patria; Hunc laudibus magnificis Magnificet ecclesia.

Ad Matutinum.

Invitatorium.

Exsultantes iubilemus Redemptori omnium,

Qui perduxit Odelricum Ad caeleste solium.

In 1. Nocturno. Antiphonae.

1. Sagina scientiae ac religionis Odelricus exstitit plenus Dei donis.

2. Festum fideles celebrent Odelrici sollemniter Et eius mira personent Magnalia suaviter.

3. Suis diebus Domino Iustus inventus placuit Odelricus, qui Dominum Sacerdos magnus coluit.

Responsoria.

1. Concelebret ecclesia Odelrici sollemnia Festiva cum laetitia, Qui verbo vitae claruit, Sanctitate resplenduit, Miraculis emicuit,

V. Cuius beatis meritis Suffragiis et inclitis Tanto magis adiuvamur, Hunc quo magis veneramur.

2. Sanctus ex Alemanniae Udalricus maioribus In Augustensi exstitit Urbe natus parentibus.

V. Cuius Ubaldus genitor, Mater Teberga opibus, Nobilitate praeminent, Decorantur insignibus.

3. Hic Odelricus duplicans Talenta pastor ovium Intrat in sui Domini Servus fidelis gaudium.

V. Non in terra fodiens Abscondit pecuniam, Sed ipsam multiplicat Prudens per industriam.

In 2. Nocturno. Antiphonae.

1. Serve prudens et fidelis, Subvenire nobis velis, Odelrice, colentibus Te tuis sanctis precibus.

2. Praesul mirae sanctitatis Est talentis duplicatis Odelricus cum beatis.

3. A paganis incolas

Augustae molestantibus Odelrici liberat Deus orationibus.

Responsoria.

1. Odelricus conspicuus Fuit omni bonitate, In fide cum spe stabilis, Fortis fuit caritate.

V. Hic Odelricus patiens Et verax in eloquiis Rectus, mitis et humilis Et iustus in iudiciis.

2. Quam felix, Augustensium Urbs, cuius pontificium Tuae proli Odelrico Dei traditur amico ! Miraculorum fulgidus Mira fuit claritate.

V. Hunc, christiana contio, Implora piis precibus, Ut per suum praesidium Loceris caeli sedibus.

3. Nitore castimoniae Odelricus coruscabat, Corpus conculcans proprium Hic frequenter ieiunabat, Austerus hic vigiliis Hoc orando castigabat.

V. Quam clara et pulcherrima Est casta generatio, Quam cum eleemosynis Bona semper oratio!

In tertio Nocturno. Antiphonae.

1. Inter regem et filium Pacis componit foedera Odelricus pacificus Qui regnat super sidera.

2. Tarri sedavit impetum

Hic praesul sanctis precibus, Ut esset tutus transitus Transire hunc volentibus.

3. Dum Odelrico aderat Corporalis potentia, Celebrabat cottidie Missarum hic sollemnia.

Responsoria.

1. Odelricum pontificem Honoremus sollenniter, Eius laudes magnificas Personemus suaviter Et hunc devotis precibus Imploremus humiliter,

V. Ut ipse rogat Dominum Pro nobis efficaciter, Quod ad aeternam gloriam Perducat nos feliciter.

2. Fuit praesul Odelricus Maximus Dei amicus, Viridis, non ramus siccus, Bonus, bonas ferens ficus, Quem recepit caeli vicus.

V. Hic a cunctis fidelibus Reverenter honorandus, Sanctissimus hic pontifex Odelricus est laudandus.

3. Odelricus exuberat Pietatis operibus, Qui largas elemosynas Largus donat pauperibus Et hospitalis colligit Vagabundos in domibus.

V. Felix, qui super pauperes Toto corde intelligit, Non habentes hospitium In sua domo colligit.

In Laudibus. Antiphonae.

1. Odelricum Dominus Induit fortitudine, Praecinxit virtutibus In omni certamine.

2. Cuncti fideles populi, Deo nostro iubilate, Servite in laetitia, Odelricum honorate.

3. Odelricus ad Dominum

Sanctus de luce vigilat, Qui fidei et operum

Splendore clarus rutilat.

4. Benedicite Domino,

Caeli, terra, maria, Qui Odelrico praesuli Regno dat caelestia.

5. In Odelrici praesulis

Festo laudet in tympano Deum fidelis populus, In cymbalis et organo.

Ad Benedictus.

A. Dominus Deus Israel,

Benedictus per omnia, Odelricum pontificem Benedixit in patria Et sibi dedit perfrui Vitae perennis gloria.

In 2. Vesperis.

Antiphonae.

1. Odelricus iustissimus In aeterna memoria Non ab auditu metuens Malo gaudet in patria.

2. Odelrice, praesidium

Tuum da tuis famulis, Libera piis precibus Nos a cunctis periculis.

3. Odelrice, roga Christum, Ut expurget mundum istum A vitiorum sordibus Informetque virtutibus.

4. Festivas age gratias,

Christicolarum contio, In Odelrici praesulis Festivo natalitio.

5. Odelrice, succurrere

Digneris tuis precibus Tuis devotis servulis Tuum festum colentibus.

Ad Magnificat.

A. Odelrice magnificis Magnifica praeconiis Christum, qui te magnificat Cum gloriosis praemiis Associatum superis Beatorum collegiis.