399. (1. ) Hymnus ad Vesperam.

1. Odelrici pontificis Festivum natalitium Concelebret sollenniter Cunctorum plebs fidelium.

2. Odas suaves personet Agens festiva gaudia Et reverenter concinat Eius mira praeconia.

3. Ortus ex Alamanniae Patre, matre nobilibus, Honestis verbis claruit Hic et iustus operibus.

4. Hic constans patientia, Pius misericordia, Caritate praestabilis, Hic mitis, castus, humilis.

5. Orationi deditus, Frequentibus ieiuniis, Largus in elemosynis, Assiduus vigiliis.

6. Odelricum sanctissimum Miraculorum gratia Mirificavit Dominus Mirabili potentia.

7. Hic praesul post tot opera Claustra relinquens infera Locatus super sidera Gaudet in aula supera.

8. Tua nos prece muniens Ab hostium insidiis, Odelrice, perennibus Fac perfrui nos praemiis.

9. Patri, nato et flamini Honor, virtus et gloria, Potestas, laus, imperium Per saecula sint omnia.