400. (2. ) Hymnus ad Matutinum.

1. Festum sollenne celebrent Odelrici cum laudibus Cuncti coetus fidelium Festivis cum honoribus.

2. Ut honoratus merito, Benignus et laudabilis Hic in eorum precibus Reddatur exaudibilis.

3. Hic in commissi populi Cura se dedit vigilem Coram Deo et homine Se praebuit et humilem.

4. Talenta sacra duplicans Pastoris per officium Fidele reddit Domino Servus prudens servitium.

5. Hic praesul Christi vernula Fidelis mente sedula Verbi divini pabula Dat populo non paucula.

6. Sanctis fulgens operibus, Potentibus miraculis, Hic felix gaudens residet Aeternis habitaculis.

7. Consociatus coetibus Beatis caeli sedibus Nunc fruitur honoribus Debitis et operibus.

8. Sit patri semper gloria, Honor, potestas filio Una cum sancto spiritu, Qui regnat caeli solio.