223. (1. ) De sancta Cruce.

1. Salve, crux sancta, salve, mundi gloria, Vera spes nostra, vera ferens gaudia, Signum salutis, salus in periculis, Vitale lignum, vitam portans omnium.

2. Te adorandam, te crucem vivificam In te redempti, dulce decus saeculi, Semper laudamus, semper tibi canimus, Per lignum servi, per te, lignum, liberi.

3. Originale crimen necans in cruce,

Nos a privatis, Christe, munda maculis,

Humanitatem miseratus fragilem

Per crucem sanctam lapsis dona veniam.

4. Protege, salva, benedic, sanctifica

Populum cunctum crucis per signaculum,

Morbos averte corporis et animae,

Hoc contra signum nullum stet periculum

5. Laus Deo patri sit in cruce filii, Laus coaequali sit sancto spiritui, Civibus summis gaudium sit angelis, Honor in mundo sit crucis inventio.