160. (2. ) Hymnus in Natale sanctorum Iohannis et Pauli.

Iohannis Paulique diem sol attulit orbi, Qui rubra martyrii serta cruore gerunt.

Unicus hos sanguis germano foedere iunxit, Unica mors fratres morsque fidesque parit.

5 Olim Romulei servantes moenia regni

Barbaricos strarant saepe mucrone globos. Nunc ovium Christi purissima saepta tuentes

Daemonicas arcent vi precibusque minas. Hos morti addixit sacra pro lege tyrannus, 10 Contemptor Christi, Julianus rabidus. Unius ille Dei cultum prius ore ferebat,

Donec ad culmen scanderet imperii. Ast ubi convaluit misero terrena potestas, Idolum vero praetulit ille Deo. 15 Tum famulos Christi lanians et sanguine pastus Innocuo horrendis saevit ubique modis. Verum ubi caelesti prospexit Christus ab arce

Audivitque pii sanguinis ille preces, Confestim misero cladem exitiabilis horae 20 Destinat, hostili hostis ut ense ruat. Vastata ecclesia Persas in bella vocarat Ac multis saeptus milibus ibat atrox, Cum subito arentes deserti ruris in agros Devenit et cuneos perdit ubique suos, 25 Qua neque victus erat nec fons nec fluminis unda, Caumate sed nimio tota iacebat humus. Dumque fremens montes, valles camposque peragrat,

Sicubi vel modico stilla liquore fluat, Incidit adversas condigno errore phalanges 30 Perfossusque atra cuspide pectus obit. Sed rabidus semper et in ipsa morte rebellis

Infremit et summum hac voce lacessit herum: Ebibe nunc nostrum, quem quaeris, Christe, cruorem Atque avidus leto iam satiare meo. 35 Ille quidem tales iusto sub iudice poenas Exsolvit, post haec Tartara caeca petens. At Domini testes sacrato sanguine loti Vertice laurigero sidera celsa petunt, Quos toga pacifico vestit praefulgida cultu 40 Regalique ambit purpura clara peplo. Hos ceu fructiferas florens paradisus olivas

Irriguo vitae iugiter amne rigat. Hi sunt aeterno candelabra fulgida templo Progenies lucis et pietatis honos, 45 Sidereo regi sublimi semper in aula

Astantes, populis qui pia vota ferunt. Quorum propitius precibus nos respice, Christe, Et purga, obscaenum quidquid inesse vides.