64 Acta Apostolicæ Sedis - Commentarium Officiale

II

SULTANPETENSIS In India nova conditur dioecesis Sultanpetensis.

FRANCISCUS EPISCOPUS

ServuS Servorum dei

ad perpetuam rei memoriam

Cum ad aeternam fovendam dominici gregis salutem eiusque regimini facilius et efficacius consulendum petitum esset nuper ut dioecesis Coimba- turensis et dioecesis Calicutensis, in India, dividerentur, ita ut territorium districtus civilis Palakkad a memoratis dioecesibus abstraheretur et in no- vam dioecesim constitueretur, Congregatio pro Gentium Evangelizatione, omnibus mature perpensis habitoque pariter faventi voto Venerabilis Fratris Salvatoris Pennacchio, Archiepiscopi titulo Montis Marani atque in India Apostolici Nuntii, admotam postulationem, in bonum animarum cessuram, censuit esse accipiendam. Nos igitur, Successor beati Petri et universalis Pater, talem sententiam libentes ratam habemus atque summa Apostolica Nostra potestate haec decernimus. A memoratis dioecesibus Coimbaturensi et Calicutensi separamus territorium districtus civilis Palakkad; ex eoque novam condimus dioecesim Sultanpetensem, lingua loci « Sultanpet » appel- landam, quam metropolitanae Sedi Verapolitanae suffraganeam facimus atque iurisdictioni Congregationis pro Gentium Evangelizatione subicimus. Praeterea iubemus Episcopi sedem poni in civitate Palakkad templumque ibidem exstans, Deo in honorem Sancti Sebastiani dicatum, ad dignitatem Cathedralis ecclesiae evehimus; cetera vero secundum canonicas leges tem- perentur. Quae praescripsimus perducet ad exitum praedictus Venerabilis Frater Salvator Pennacchio; qui, re acta, curabit documenta exaranda sin- cerisque exemplis Congregationi pro Gentium Evangelizatione mittenda. Hanc denique Apostolicam Constitutionem nunc et in posterum ratam esse volumus, contrariis quibuslibet rebus non obstantibus.

Datum Romae, apud S. Petrum, die duodetricesimo mensis Decembris,

anno Domini bis millesimo decimo tertio, Pontificatus Nostri primo.

De mandato Summi Pontificis

c petruS parolin

Secretarius Status Loco G Plumbi In Secret. Status tab., n. 21.862