125. (5. ) Hymnus sancti lamiani Martyris.

1. Festa, quae magno colimus novoque Gaudio, martyr Ianuarius mox Fautor invisit Dominoque laudum Munera perfert.

2. Additur tanto penitus favori Caesar illustris cumulatque vota Nomini trino tua, pacis auctrix, Pompa, Lothari.

3. Gratias summo ferimus parenti, Qui diem tanti voluit tropaei Regis in nostri redimire magno Lumine votum.

4. Concrepat tellus Latium per omne. Tota miratur via Transpadani Liminis, quidnam nova gaudiorum Nuntia signent.

5. Alta Penninus iuga flectit, horror Solvit et cautes, retrahit fluenta, Murmurant silvae, silices feraeque, Terra stupescit.

6. Inde Ticini superatur amnis, Mysticis gaudens pariter camenis Vera respondet stupidasque mentes Erigit orsis.

7. Urbe de magna numeri perennis Unus advenit, iuvet ut beatum Caesaris nostri populique proni Semper honorem.

8. Hinc viri, matres, iuvenes senesque, Divites, sani, tenues et aegri, Quique, quod possunt, genus administrant Laudis honestae.

9. Ipse pugnaces docet et phalanges Instar agnorum reboare laudes Pacis, oblitas odii nocentis Induperator.

10. Purpuram, sceptrum, diadema, fasces Militum turmas, decus et paternum Temnit, ut Christi melius honorem Comprobet in se.

11. Nam pedes multis medius catervis Vadit et sacro scapulas feretro Ossa gesturus pretiosa subdit Martyris almi.

12. Clerus orditur sequiturque clerus, Gesta mirandae sacra passionis, Militis Christi referens triumphum Vocibus istis:

13. Floridam mundi speciem, beate Martyr, ut luti maculas putasti, Respuens omnes vitiantis aevi Pectore noxas.

14. Omne tormentum gladiosque saevos Corde risisti, solido supernam Intuens palmam genus omne leti Lene putando.

15. Tu pios inter speciale fratres Munus invictae fidei secutus Spiritus inter superos mereris Esse coheres.

16. Te sacerdotum veneratur ordo, Hostiam temet quia victimamque Vividam Christo sacra proferendo Dona litasti.

17. Tota te plebis populique passim Turba collaudat Dominumque pro te, Quos tui saevam faciunt agones Temnere mortem.

18. Ergo gratanter capito pieque

Dona, quae magnus parat imperator, Iam subi sedes tibi praeparatas Munere largo.

19. Illius regnum spatiumque vitae, Coniugem, prolem populum fidelem Semper oratu meritisque, martyr Alme, iuvato.