Walahfridus Strabo, Abbas Augiensis, d. 849.
121. (1. ) Hymnus de Natale Domini.
122. (2. ) Sabbato Quattuor Temporum
123. (3. ) Hymnus de sancto Gallo
124. (4. ) In Natalem sancti Mammetis
125. (5. ) Hymnus sancti lamiani Martyris.
127. (7. ) De beata Maria Virgine.
129. (9. ) In Adventu Hlotharii Imperatoris.
Hymnus eiusdem Strabonis.
1. Laudem beati martyris Ad trinitatis gloriam Sanctae canamus supplices, Quae dat coronam testibus.
2. Adversa mundi pertulit, Calcavit eius prospera, Mammes tonanti reddidit, Quod pro reis hic passus est.
3. Virtute, vita, moribus, Sermone Jucundissimus, In caritatis gratia Semper manens ditissimus,
4. Spernens opes cum casibus Mundi supernis institit, Liber caducis exiit Nil ambiens ex infimis.
5. Mitis domans immitia Illisque promens mystica Vivebat inter bestias, Quo cive gaudent angeli.
6. Adiutus armis spiritus Vicit furores principum, Saevi draconis conterens Sacris caput conatibus.
7. Magni favor praeconii Debetur isti martyri, Cui Christus esset vivere, Lucrum resolvi maximum.
8. Mansit fides in pectore, Spes mente felix integra, His maior illum caritas Intus, foris possederat.
9. Exsultet omnis supplicum Coetus sereno gaudio Huius patris suffragia Pronis rogando cordibus.
10. Te, martyr, ergo quaesummus, Mammes, fave poscentibus, Sacro precatu protege, Quos instruis certamine.
11. Impende curam dapsilis, Aufer malum placabilis, Confer boni solacia Vitae parando praemia.
12. Sit trinitati gloria,
Virtus, honor per saecula, Quae nos beatis martyrum Semper iuvet suffragiis.