121. (1. ) Hymnus de Natale Domini.

1. Gloriam nato cecinere Christo Angeli, famam retulere clara Voce pastores, nova concrepabant Gaudia mundo.

2. Laus in excelsis, pia pax in arvis Dicitur magnis celebranda votis, Omnis adventu Domini movetur Machina rerum.

3. Virgo conceptu gravidatur almo, Coniugum mutae sterilesque fibrae Iam vigent donis uteri, prophetat Carcere vates.

4. Splendidam caeli faculam dedere, Movit ardorem sacra lux magorum, Territant saevam nova Iudaeorum Nuntia plebem.

5. Sera longaevus Simeon videndo Vota tam longe prius expetitam Praedicat cunctis Domini salutem Patris adesse.

6. Anna iam natu gravior, repente Lucis attactu penetrata sanctae, Quod diu traxit toleranter aevum, Laeta peregit.

7. Martyrum flores ferus interemptor Milibus multis avide cruorem Quaeritans Christi cruciat malignae Frigore mentis.

8. Ergo quam nostrae caput optionis Novimus luceni celebrare plenis Gaudiis, omni studeamus almae Pacis amore.

9. Editus sacro patris ore semper Virginis casta voluit sub alvo Arta naturae tolerare factor Munia nostrae.

10. Virgo portantem veneranda portat, Lactat altorem, vehit et parentem, Spiritu praegnans operantis in se Mater opusque.

11. Veritas terra pietasque nata est, Solvit et primae maledictionis Damna, pro spinis tribulisque fructum Terra ministrat.

12. Fructus hic terrae prius a propheta Valde sublimis fuit indicatus, Qui greges sanctos saturare vivo Pane valeret.

13. Hic sub humana specie coruscans Vile praesaepis voluit cubile Ferre, quo sese dare nuntiaret Pascua pastor.

14. Gaudeat caeli chorus, ut creator Eius antiquum numerum novaret, Ipse descendit, simul et superbum Sterneret hostem.

15. Terra laetetur radiata tanti

Luminis tractu genus et redemptum Vota gratanti voveat feratque Debita mente.

16. Christe, regnorum dominator, auge Principi nostro decus et triumphos Eius et prolem bene cum pudica Coniuge salva,

17. Sponsa quo felix tua sub patronis Polleat tantis merito locoque Praeminens mundo maneatque longa Pace fidelis.

18. Christe, da nobis tua iussa vero Corde sectari simul et beatis Actibus vitae nitidum mereri Stemma perennis.

19. Praestet hoc nobis deitas beata Patris et nati pariterque sancti Spiritus, summa pietate regnans Omne per aevum.