9. Rosarium beatae Mariae V.

Introductio.

1. Salve, mater, virgo munda,
Semper manens laetabunda
Coram dulci filio,

2. Vellem tibi congaudere
Et cor meum exercere
ln tui praeconio.

3. Ad hoc ergo te imploro
Toto cordeque exoro,
Mihi sis praesidio,

4. Cor et linguam pie munda,
Ne in tuae sint immunda
Laudis exercitio.

5. Virgo cunctis semper pia,

Assis mihi nunc, Maria,

Pio cum suffragio.

I.

1. Gaude, virgo, fragrans rosa,
Sine spinis gratiosa,
Sempiterno numini.

2. Gaude, virgo praeelecta,
Ab aeterno ut dilecta
Fias mater Domini.

3. Gaude, quia sub obscuris
Patriarchae te figuris
Monstravere variis.

4. Gaude, dicunt nam prophetae
Dei matrem fore tete
Suis vaticiniis.

5. Gaude, patri nuntiata
Es a Deo nondum nata
Horto matris uteri.

6. Gaude, virgo reverenda,
Es concepta sine menda,
Qua nascuntur ceteri.

7. Gaude, cernis ventre matris
Clausa lucem summi patris,
Qua finiuntur angeli.

8. Gaude, vides mente Deum,
Quando dormis, laudans eum,
Quem laudant archangeli.

9. Gaude, virgo Deo cara,
Ortu tuo nam praeclara
Praestas mundo gaudia.

10. Gaude, caelum iucundatur,
Dum te parvam contemplatur
Natam tali gratia.

11. Pia mater, fac fundati
Simus zelo tui nati
In oboedientia. Amen.

II.

1. Gaude, caelo fuit grata
Tui trimae templo facta
Sancta praesentatio.

2. Gaude, fervens et devota,
Nam exemplar eras tota
Virginum collegio.

3. Gaude, quia te amabant
Et persaepe visitabant
Templo caeli spiritus.

4. Gaude, manus angelorum
Tulit hora vesperorum
Panem tibi caelitus.

5. Gaude, scandis raptu mentis
Super caelos, ubi sentis
Nulli dicibilia.

6. Gaude, totam te dedisti
Deo tuo et novisti
Virginum vestigia.

7. Gaude, Deo sic oblata,
Es regina dedicata
Virginum seraphica.

8. Gaude, tecum fabulantur
Caeli cives et versantur,
Ac si fores caelica.

9. Gaude, Ioseph sponsa pura,
Semper tamen possessura
Virginum insignia.

10. Gaude, linquens templum Dei
Comitata his, qui ei
Serviunt in patria.

11. Pia mater, paupertatis,
Purae quoque castitatis
Sit in nobis gloria.

iii.

1. Gaude, rogans summum patrem,
Nam facturus est te matrem
Sui nati nobilem.

2. Gaude, virgo valde fortis,
Quae disruptis caeli portis
Vincis invincibilem.

3. Gaude, prece tua facis
Cogitare Deum pacis
Cogitatus stabiles.

4. Gaude, virgo, ave, munda,
Semper florens et iucunda,
Fovens pie flebiles.

5. Gaude, virgo valde pia,
Dulcis mater, o Maria,
Es tu plena gratia.

6. Gaude, virgo benedicta
Intra omnes, tecum vita
Deus hac et alia.

7. Gaude, cunctis denegatam
Apud Deum peroptatam
Invenisti gratiam.

8. Gaude, iussa Dei sui
Caelo ferens adit tui
Gabriel praesentiam.

9. Gaude, virgo, mater Christi,
Aure Iesum concepisti
Gabriele nuntio.

10. Gaude, ventris tui velum
Paradisus fit et caelum
Dei domicilio.

11. Pia mater, nostra mente
Vivae crescat et non lentae
Fidei devotio.

IV.

1. Gaude, virgo, negas metam
Laudi Dei, cum te laetam
Concepisse cerneres.

2. Gaude, scandis festinanter
Iudae montes, ut laetanter
Sterilem iam viseres.

3. Gaude, virgo, dum laudaris
A cognata, modularis
Canticum Magnificat.

4. Gaude, pater praecursoris,
Dum prophetat laxis loris
Linguae, te laetificat.

5. Gaude, nam quem concepisti,
Ventre sacro tu tulisti
Iesum novem mensibus.

6. Gaude, Ioseph perturbatus
De te restat quietatus
Angeli sermonibus.

7. Gaude, cernis propinquare
Laeta nimis et instare
Partus tui terminum.

8. Gaude, Ioseph comitata
Et in Bethlem deportata
Paritura Dominum.

9. Gaude, virgo, resplendebat
Tuus vultus, dum manebat
Iesus tuo corpore.

10. Gaude, coetus angelorum
Te invisit beatorum
Ortus Iesu tempore.

11. Pia mater, spem ponamus
Morte Iesu, qua fidamus
Rei mortis litore.

V.

1. Gaude, virgo Deo plena,
Peperisti sine poena
Cum supremo gaudio.

2. Gaude, nato salvatore
Caeli cives cum dulcore
Canunt in praesaepio.

3. Gaude, Iesum vagientem
Et in terra tunc iacentem
Colis cum laetitia.

4. Gaude, Iesum reverenter
Terra tollis, quem gaudenter
Tenes inter brachia.

5. Gaude, cernis Iesu visum,
Renidentem paradisum
Grandi cum solacio.

6. Gaude, videns Iesu frontem

Contemplaris ibi fontem

Vitae cum tripudio.

7. Gaude, Iesu cum ocellos
Vides, mente super caelos
Scandis suavissime.

8. Gaude, nares contemplando
Dulcis Iesu iubilando
Gaudes quam dulcissime.

9. Gaude, virgo, nam gaudebas,
Labra tua dum iungebas
Sanctis Iesu labiis.

10. Gaude, David stirpe nata,
Es os Iesu contemplata
Cum immensis gaudiis.

11. Pia mater, diligamus
Fratres Deumque colamus
Intimis praecordiis.

TI.

1. Gaude, genas oscularis
Iesu dulcis et laetaris
Intimis visceribus.

2. Gaude, cernis in praesaepe
Aures Iesu, quas persaepe
Mulces verbis dulcibus.

3. Gaude, pulchro Iesu mento

Laeta nimis in momento

Plura dabas oscula.

4. Gaude, virgo singularis,
Guttur Iesu contemplaris
Cum non parva morula.

5. Gaude, virgo, nam lacertos

Iesu pingues et exsertos,

Tangis ore proprio.

6. Gaude, cernis elegantes
Iesu manus, quas vernantes
Premis dulci basio.

7. Gaude, lacte tuo lotum
Stringis corpus Iesu totum
Dulcibus amplexibus.

8. Gaude, pedes amplexaris

Tui nati, quos adfaris

Amorosis vocibus.

9. Gaude, pannis involvisti
Lacque pium tribuisti
Tuo dulci filio.

10. Gaude, Ioseph amplexatur
Dulcem Iesum et laetatur
Cordiali gaudio.

11. Pia mater, serpentini
Simus atque columbini
Vacuati vitio.

VII.

1. Gaude, Iesum, quem locasti
Super foenum, adorasti
Cinctum stricta fascia.

2. Gaude, Iesum bruta nexa
Ad praesaepe genuflexa
Colunt animalia.

3. Gaude, dixit ad pastores
Caeli civis hos rumores:
Nunc est ortus Dominus.

4. Gaude, laudes Deo vere
Caeli cives cantavere
ln excelsis protinus.

5. Gaude, ortu tui nati
Laudes canunt trinitati
Angeli in aethere.

6. Gaude, ruunt caelo statim
Caeli cives catervatim
Natum tuum colere.

7. Gaude, Iesum vagientem
In praesaepi recumbentem
Colit pastor quilibet.

8. Gaude, visa conservabas
Et in corde conferebas
Iesu dicta quaelibet.

9. Gaude, sentis nam dulcorem
Magnum lactans Iesum, florem
Paradisi, saepius.

10. Gaude, saepe tuum natum
Amplexaris, quem lactatum
Oscularis dulcius.

11. Pia mater, esurire

Fac nos semper et sitire
Illud, quod est iustius.

VIII.

1. Gaude, virgo, magi dona
Tuo nato ferunt bona
Grandi cum mysterio.

2. Gaude, mater reverenda,
Membra Iesu sine menda
Lavas dulci gaudio.

3. Gaude, virgo laetabunda,

Iesum portas periucunda

Cum devotis gressibus.

4. Gaude, Iesum induisti
Veste munda, quam fecisti
Sacris tuis manibus.

5. Gaude, virgo, nam gaudebas,
Tuo Iesum cum videbas
Quiescentem gremio.

6. Gaude, ponis tuum natum
Super tuum cor ornatum
Caeli dextrochirio.

7. Gaude, tuum cor gaudebat,
Quando Iesus dependebat
Tuis ab uberibus.

8. Gaude, Iesu ministrarunt
Tuae manus et cibarunt
Dulcibus affectibus.

9. Gaude, virgo te iuvabant

Caeli cives et astabant,

Cum servires filio.

10. Gaude, Iesum osculata
Es, o virgo, et adfata
Ore tuo proprio.

11. Pia mater, in adversis
Fortes simus universis
Huius mundi proelio.

IX.

1. Gaude, virgo, recreans
Odoratu tuae naris
Odorantis filium.

2. Gaude, figis dum obtutum
Vultu Iesu sic acutum,
Crescit tui gaudium.

3. Gaude, virgo, iuxta legem
Obtulisti mundi regem
Aedis in sacrario.

4. Gaude, mater, exsultavit,
De te quoque prophetavit
Simeon et filio.

5. Gaude, puer quando crescit,
Virgo pia, sic accrescit
Tui cordis gaudium.

6. Gaude, blande complexatur
Et te Iesus osculatur,
Tui puerperium.

7. Gaude, dum te mammam vocat,
Se in sinu tuo locat
Iesus quaerens ubera.

8. Gaude, pio tunc amplexu
Iesum stringis dulci nexu,
O virgo puerpera.

9. Gaude, Iesu lac praebebas
Sacris mammis et gaudebas
Maxima laetitia.

10. Gaude, Iesum retrahebas
A mamillis et figebas
Ori suo basia.

11. Pia mater, moderati
Simus, fac, et temperati
Zeli Iesu gratia.

X.

1. Gaude, Iesum sic adfaris:
Care fili singularis,
Quis te non diligeret?

2. Gaude, Iesum nam pectendo
Gaudes: nate, quis, dicendo,
Te a me divideret?

3. Gaude, Iesum adorabas
Et de eo satiabas
Te Deo et homine.

4. Gaude, Iesum lecto levas,
Membra cuius aqua lavas
Nimia dulcedine.

5. Gaude, Iesum spoliabas
Et in lecto collocabas,
Cordis tui gandium.

6. Gaude, cunctos propter actus,
Pios sanctosque contactus
Erga tui filium.

7. Gaude, Iesum genitorem
Vocas modo creatorem,
Modo dulcem filium.

8. Gaude, virgo, stella maris,
Tuo nato nam bearis
Pie linguis omnium.

9. Gaude, virgo speciosa,
De te namque gloriosa
Dicta sunt ab omnibus.

10. Gaude, domum es revecta
A Ioseph cum Iesu laeta
Ex Aegypti finibus.

11. Pia mater, pietati
Studeamus tui nati
Collaudare vocibus.

XI.

1. Gaude, Iesum, quem quaesisti,
Laeta nimis invenisti
In doctorum medio.

2. Gaude, nato tu dixisti:
Fili, nobis quid fecisti?
Sic astringens brachio.

3. Gaude, tecum domum redit,
Tibi patrique obedit
Dulcis tui filius.

4. Gaude, tuum cor laetatur,
Quando Iesus fabulatur
Tecum, virgo, dulcius.

5. Gaude, virgo, conversaris
Atque gaudens hospitaris
Cum tam dulci filio.

6. Gaude, virgo, corde tuo,
Te honorat Iesus suo
Humili servitio.

7. Gaude, Ioseph lacrimatur
Ob dulcorem, dum adfatur
Tuum dulcem filium.

8. Gaude, Ioseph, sponsus tui,
Iesu, tibi quoque sui
Praestitit obsequium.

9. Gaude, licet viduata
Morte Ioseph, consolata
Es a dulci filio.

10. Gaude, Iesus aqua merum
Te optante fecit verum
Primo pro prodigio.

11. Pia mater, nos ingratos,
Culpis multis adgravatos
Cruciet contritio.

XII.

1. Gaude, Iesus Magdalenam
Ad se traxit illi poenam
Condonans et gratiam.

2. Gaude, multi convertuntur
A peccatis et sequuntur
Tui nati sophiam.

3. Gaude, vivus dum resurgit
Marthae frater; sic consurgit
Tui nati gloria.

4. Gaude, Iesus pauco pane,
Pisce quoque cibat sane
Viros quinque milia.

5. Gaude, Iesum ultra mare

Plebs devota coronare

Regem sibi voluit.

6. Gaude, lumen caeco nato
Iesus dedit, quo vulgato
Fama sui viguit.

7. Gaude, Iesus hospitatur
Domo Marthae, quae laetatur
De tam dulci hospite.

8. Gaude, zelo Iesu plena
Unxit ipsum Magdalena
Unguento in capite.

9. Gaude, Iesus confirmabat,
Quam doctrinam praedicabat,
Plurimis miraculis.

10. Gaude, Iesu obviatur
Et cum palmis decantatur
Hosanna a populis.

11. Pia mater, non elati
Simus, immo corde strati,
Humiles cum parvulis.

XIII.

1. Gaude, Iesum, quem planxisti,
Suscitatum tu vidisti
Cum fulgenti gloria.

2. Gaude, prima visitata
Es a Iesu, consolata
Cincto caeli curia.

3. Gaude, palpas, oscularis,
Virgo, mater singularis,
Tuum dulcem filium.

4. Gaude, virgo, Iesu data
Caelo, terris et firmata
Potestate omnium.

5. Gaude, cernis suscitatum
Laeta Ioseph, decoratum
Stola sui corporis.

6. Gaude, vides Adae natos
Tunc a Iesu liberatos
Iugo tanto temporis.

7. Gaude, Iesus tecum sedit
Monte Sion et comedit
Tecum grandi gaudio.

8. Gaude Iesu ascendente,
Qui in caelum te vidente
Motu fertur proprio.

9. Gaude, portae nobis per te
Paradisi sunt apertae
Clausae per tot saecula.

10. Gaude, cernis comitantes
Iesum patres, penetrantes
Caeli tabernacula.

11. Pia mater, agnoscamus
Nosmet esse et dicamus
Putrida corpuscula.

XIV.

1. Gaude, Iesus cum ascendit,
Tua quoque mens conscendit
Secum caeli curiam.

2. Gaude, licet ascendisti,
Prius tamen cognovisti
Dandam tibi gloriam.

3. Gaude, quia Iesus misit
Sanctum pneuma, quod promisit,
Fervidis discipulis.

4. Gaude, fides dilatatur
Iesu dulcis et vulgatur
Gentium in populis.

5. Gaude, Iesus visitavit
Saepe te et cumulavit
Causas tui gaudii.

6. Gaude, virgo, cum volebas,
Rapta caelos ascendebas
Ad amplexus filii.

7. Gaude, te non deserebat,

Iesus enim sic volebat,

Gabriel perlucidus.

8. Gaude, venit saepe laetus
Ad te caelo, virgo, coetus
Angelorum nitidus.

9. Gaude, tibi nuntiata
Hora mortis est optata,
Qua ad natum transeas.

10. Gaude, tibi congregati
Iesu Christi sunt legati,
Ut de mundo exeas.

11. Pia mater, fac orare
Nos attente et plorare
Culpas nostri felleas.

XV.

1. Gaude, tuac morti sanctae
Nullus daemon Deo dante
Interesse potuit.

2. Gaude, Iesus, benedictus
Fructus ventris tui dictus,
Morti tuae adfuit.

3. Gaude, virgo tradidisti
Tunc in manus Iesu Christi
Animam innoxiam.

4. Gaude, Iesus suscitavit
Te a morte et portavit
Ad caelestem patriam.

5. Gaude, cunctos praecedebat

Ob te laetus et monebat

Gabriel ad gaudium.

6. Gaude, virgo, obviavit
Et festine salutavit
Caeli te collegium.

7. Gaude, cunctos Adae natos
Pie tuens, quo beatos
Super scandis angelos.

8. Gaude, virgo pia, latum
Iuste regens mundi statum
Transsilis archangelos.

9. Gaude, caeli principatus
Tu excedis cuncti status
Praesidens principibus.

10. Gaude, multis a te signis
Factis omni laude dignis
Scandis prae virtutibus.

11. Pia mater, mortem flentes
Iesu simus patientes
In adversis omnibus.

XVI.

1. Gaude, caeli potestates
Antecellis feritates
Sternens in daemonio.

2. Gaude, praeses caeli digna,
Tibi subest nunc benigna
Caeli dominatio.

3. Gaude, mater Dei, thronos
Transis, cui dulces sonos
Caeli facit curia.

4. Gaude, virgo, praecessisti
Cherub omnem, quem vicisti
Domini notitia.

5. Gaude, vincis in amore
Seraph omnem cum dulcore
Scandens ad principium.

6. Gaude, laeta pervenisti
Ante thronum Iesu Christi
Atque Dei solium.

7. Gaude, coram trinitate,
Virgo plena sanctitate,
Genu flectis humilis.

8. Gaude, Iesus te laudavit,
Post reginam coronavit
Regni caeli stabilis.

9. Gaude, virgo coronata,
Es in caelo collocata
Iuxta dulcem filium.

10. Gaude, plaudunt, iucundantur
Caeli cives ac laetantur
Tuum ob imperium.

11. Pia mater, ut optamus,
Fac, in morte sentiamus
Tui patrocinium.

XVII.

1. Gaude, virgo gloriosa,
Est nam tota luminosa
Per te caeli curia.

2. Gaude, Iesus semper audit

Tuas preces et exaudit

Boni nostri gratia.

3. Gaude, Deo non est gratum

Munus ullum non oblatum

Sacris tuis manibus.

4. Gaude, ullum non habemus
Donum Dei nec tenemus,
Nisi tuis precibus.

5. Gaude, Deum mitigare

Sola potens et placare

Contra nostra vitia.

6. Gaude, virgo, salvat multos
Deus propter te, non ultos
Damnat quos iustitia.

7. Gaude, fugit cum furore
Daemon omnis prae timore
Tuum nomen audiens.

8. Gaude, culpis iam ruisset
Orbis, Deus ni fuisset
Tua prece patiens.

9. Gaude, Iesus bona dabit
Tuis servis, hic praestabit
Quibus caeli gloriam.

10. Gaude, reum nullum spernis,
Quem currentem fide cernis
Tuam ad clementiam.

11. Pia mater, tuus natus
Nobis boni cuncti status
Det perseverantiam.

Conclusio.

1. Gande, semper venerata
Es a cunctis et laudata
Paradisi civibus.

2. Gande, virgo, nam gaudebis.

Nos gaudere cum videbis

Tecum in caelestibus.

3. Gaude, splendens vas virtutum,
Tibi paret, en, ad nutum
Tota caeli caria.

4. Gaude, virgo, non decrescent
Nec cessabunt, sed accrescent
Semper tua gaudia.

5. Virgo, mundi reparatrix,
Poli cernas imperatris
Tuita me propitio.

6. Tibi munus hoc oblatum
A me fiat tibi gratum
Atque tui filio.

7. Hic sum dignus pro peccatis
A me, virgo, perpetratis
Horrido supplicio,

8. Sed tu, Iesum mitigare
Sola potens et placare
In furore nimio,

9. Precor, mei miserere
Et illaesum me tuere
Tuo forti brachio.