Prima Quinquagena.

1. Almiflua, pulcherrima
Regina caeli, gaude,
Decora, celeberrima,
Perenni digna laude.

2. Venusta, pulchra facie,
Tu es agnominata,
Maria, mater gratiae,
Reorum advocata.

3. En, virgo, de regalibus,
Ingenua, mirosa,
Progenita natalibus,
Illustris et famosa.

4. Decora, commendabilis,
Trans ordinem naturae,
Quae nam incomparabilis
Es omni creaturae.

5. Omnimode gratissima,
Mirifice praeclara,
Quae es et praepurissima,
Caelesti Deo cara.

6. Magistra pudicitiae,
Puella puritatis
Imagoque munditiae,
Sigillum castitatis.

7. Illustras omne saeculum
Clarifico splendore,
Nitescis quasi speculum
Mirifico nitore.

8. Nam coma fulvet aurea
Tis pulchre redimita,
Quam ornat vitta laurea,
Quae desuper est sita.

9. At frontis superficies
Est tua perserena,
Quam candida mundities
Venustat et amoena.

10. Nequaquam supercilia
Deficient a laude,
Quae vere sunt subtilia
Et carent omni fraude.

11. O quam praeclaro lumine
Sunt oculi micantes,
Ut stellae de cacumine
Caelorum illustrantes.

12. Sunt nares aequalissimi,
Sunt labia rubentes,
Ut ebur candidissimi

Resplendent, ecce, dentes.

13. Tu nata regis unica,

Sic rubent tuae genae
Ceu grata mala punica,
Sunt aures praeserenae.

14. Revera cervix regia
Nitescit ebenina,
Sed tua praeegregia
Sunt brachia cedrina.

15. Ast manus tuae ductiles
Sunt aloes ex ligno
Cum digitis tornatiles,
Candidiores cygno.

16. Ut species clarissimi
Crystalli diaphani
Sunt ungues sincerissimi,
Spectabiles et plani.

17. Innubiles, virgineae

Tumescunt tis mamillae,
Praeclarae botris vineae
Nam comparantur illae.

18. Regina, tuus venter est

Ut hortus circumclusus,
Qui floribus frequenter est
Vernantibus perfusus.

19. Gratissima tu femina,
Prae ceteris electa,
Sunt tua crura gemina
Marmorea, directa.

20. Ornatu devotissimo
Fulgentiores astro
Stant pedes, nitidissimo
Qui sunt ex alabastro.

21. Miratur, ecce, ratio
Superexcellentive,
Quod cutis dealbatio
Candidior sit nive.

22. At tota dispositio

Tis corporis sacrati
Sic caret omni vitio
Reatuque peccati,

23. Revera quod per singula
Nequibit explicare
Vox aut humana lingula
Condigne collaudare

24. Immensam pulchritudinem,
Sinceram caritatem,
Praecelsam sanctitudinem
Tuamque dignitatem.

25. Ad dextram Dei filii
Vestita deaurate,
Spes nobis es auxilii
Nunc cum varietate.

26. Gemmata iacinthinea

Cum veste stas amicta,
Cum chlamyde coccinea,
Tu virgo benedicta.

27. Respiras velut fragula

Cum purpura bis tincta,
Vestita molli stragula,
Cum balteo praecincta.

28. At tu cum ostro vario
Stas pulchre redimita,
Cum opere plumario
Decenter insignita.

29. Tu bysso torta serico,
Maria, circumdaris,
O rosula de Iericho,
Praeclara stella maris.

30. In polymitis vestibus
Nec non aurificatis
Laetaris cum caelestibus
Spiritibus beatis.

31. Assistis in cubilibus
Supernis exaltata,
Muraenulis, monilibus
Et annulis ornata.

32. Praeclaris et nitentibus
Cum gemmulis politis,
In fimbriis fulgentibus
Ornaris margaritis,

33. Lucifluis carbunculis,

Smaragdis et crystallis,
Saphiris et iaspunculis,
Chrysolithis, corallis,

34. Eutropiis, topaziis,

Iacinthis, amethystis,
Rubinis, chrysopraziis
Lapidibus electis,

35. Nitentibus sardoniis,
Pyropis et beryllis,
Electis cassidoniis
Cum ceteris lapillis.

36. Auratis in sandaliis,

Quam pulchros habes gres-
sus,
In ornamentis aliis
Est plurimis excessus.

37. Decora mala punica,
Cedrina tua poma
Fers in talari tunica,
Quae spirat ut aroma.

38. O quantum tuum pallium

Est fragrans, in quo legis
Tu lilia convallium,
Aeterni sponsa regis.

39. Munitas, virgo, violas
Carpescis redolentes,
Recondens has in fialas,
Praeclare renidentes.

40. Ingenuae rubedinis

Carpescis, ecce, rosas,
Vernantis et albedinis
Plerumque speciosas.

41. Novellis, virgo, floribus
Respiras constipata,
De quorum tu coloribus
Resplendes adornata.

42. Virgultis in umbraticis
Ab esca requiescis,
In hortis aromaticis
Suave redolescis.

43. Sub umbra tui thalami

Tu, virgo, mater alma,
Nunc redolent et calami
Cum murra, gutta, palma.

44. Tus, myrtus, nardus pistica,
Cum stactis therebinthus
Et scorax non sophistica
Respirant illuc intus.

45. Excelsa cedrus Libani,
Cupressus ac oliva,
Ramosa frons olibani
Laurusque semper viva,

46. Cum vico florens vinea,
Amygdalum, amomum,
Procera malus punica,
Nec abest cinnamomum.

47. Virentis rami platanus,

Cum croco succomorus,
Et balsamus eatenus
Fragrescit atque morus,

48. Mandragora pomifera
Cum foliis venustis
Et mastix odorifera
Cum ceteris arbustis.

49. Benigna mundi domina,

Praedulcis mater Christi,
Ad bona nobis omina
Messiam genuisti.

50. Es stella clari luminis

Ostendens nautis portum,
Impetuosi fluminis

Fons rigat tuum hortum.