Tertia Quinquagena.

1. Ave, stella magni maris,
Naufragantis plebis portus.

2. Ave, iure nuncuparis
Humanae salutis ortus.

3. Ave, pulchra velut luna,
Astris es rutilantior.

4. Ave, in qua mens humana
Affectu est flagrantior.

5. Ave, quae ut sol electa
In theca es uranica.

6. Ave, devote affecta
In contione caelica.

7. Ave, quia luna, sole
Admiranter amicta es

8. Ave, regens sine mole
Orionas et pleiades.

9. Ave, cacumen Olympi
Supergressa aethereum.

10. Ave, gracilis flos campi,
Culmen excedens astriferum.

11. Ave, angelorum mater,
Catervae caelicae grata.

12: Ave, tornatilis crater,
Angelica colens prata.

13. Ave, o principativa

Et sagax rectrix principum.

14. Ave, o potestativa

Et repressiva daemonum.

15. Ave, o archangelica,
Paranymphis sublimior.

16. Ave, virtutum amica,
Virtutibus intimior.

17. Ave, quia dominaris
Ierarchicis ordinibus.

18. Ave, thronica vocaris
In caelorum agminibus.

19. Ave, virgo seraphica,
Superferenda amore.

20. Ave, quia theotoca
Deifero es ardore.

21. Ave, o superfluida,

Ad divinum ignem liquens.

22. Ave, o hyperdulicon
Incessanter ardens.

23. Ave, gloriam adferens
Apostolis, martyribus.

24. Ave, celeuma concinens
Viduis et virginibus.

25. Ave, o limpidissima
Caelica cognitione.

26. Ave, o ardentissima
Sincera devotione.

27. Ave, opulentissima
In sacra fruitione.

28. Ave, o beatissima,
Intima in unione.

29. Ave, laude indefessa

Almificum numen laudans.

30. Ave, perpetim possessa
Turmis summis congratulans.

31. Ave, virgo assidua
Gratiarum actione.

32. Ave, o individua
Aeterna inhaesione.

33. Ave, laureis ditata,
In praemiis uberrima.

34. Ave, per quam vernant prata
Meritis saluberrima.

35. Ave, virgo agillima,
Radiis solis velocior.

36. Ave, mater gracillima,
Sole et luna splendidior.

37. Ave, firmamenti candor,
Immortalitate plena.

38. Ave, es catervis odor,
Subtilitate serena.

39. Ave, divis in montibus
Celsi Olympi saliens.

40. Ave, potata fontibus,

Summos colles transsiliens.

41. Ave, quae in meridie

Cubas sponsum amxplexando.

42. Ave, stillans cotidie
Pacem homini salvando.

43. Ave, in aula supera
Fruens bonis caelestibus.

44. Ave, caelica atria
Largitura terrestribus.

45. Ave, caelicum agalma,
Iu quo recumbit trinitas.

46. Ave, canens per pneuma
Paradisiacas odas.

47. Ave, quae supra verticem
Celsum Arcturi resides.

48. Ave, quae caelicam arcem
Summis apicibus tenes.

49. Ave, dilecti thalamum

Intrans divinum per flamen.

50. Ave, epithalamium

Neumaque resonens. Amen.