Acta Apostolicae Sedis - Commentarium Officiale708

Hermeneutica sacrae Scripturae in Ecclesia

Ecclesia, originalis sedes hermeneuticae Bibliorum

29. Aliud magni ponderis argumentum agitatum in Synodo, ad quod

nunc mentem vertere intendimus, respicit interpretationem sacrae Scripturae

in Ecclesia. Nexus ipse intrinsecus inter Verbum et fidem perspicue ostendit

authenticam hermeneuticam Bibliorum exsistere non posse nisi in fide eccle-

siali, cuius exemplar invenitur in consensu Mariae. Sanctus Bonaventura ad

rem affirmat quod absque fide deest clavis accedendi ad textum sacrum:

« Haec est notitia Iesu Christi, ex qua originaliter manat firmitas et intelli-

gentia totius sacrae Scripturae. Unde et impossibile est, quod aliquis in ipsam

ingrediatur agnoscendam, nisi prius Christi fidem habeat sibi infusam,

tamquam totius Scripturae lucernam et ianuam et etiam fundamentum ».84

Et sanctus Thomas Aquinas, sanctum Augustinum memorans, vehementer

instat: « Unde etiam littera Evangelii occideret, nisi adesset interius gratia

fidei sanans ».85

Et hoc occasionem nobis praebet recolendi criterium fundamentale

hermeneuticae biblicae: sedes originalis interpretationis Scripturae est vita

Ecclesiae. Assertio haec non exhibet indicium ecclesiale veluti criterium

extrinsecum cui exegetae subici teneantur, sed requiritur ex ipsa realitate

Scripturarum et ex modo quo temporis decursu sunt formatae. Etenim,

« traditiones fidei vitalem ambitum constituebant in quem activitas

litteraria auctorum sacrae Scripturae inserebatur. Insertio haec secum

ferebat quoque ius participandi vitam liturgicam et externam activitatem

communitatis, eorum mundum spiritualem, eorum culturam et

vicissitudines historicae fortunae. Itaque interpretatio sacrae Scripturae,

simili modo, requirit ut exegetae partes habeant totius vitae et totius fidei

communitatis credentis temporis illorum ».86 Quapropter, « cum sacra

Scriptura eodem Spiritu quo scripta est etiam legenda et interpretanda

sit »,87 exegetae, theologi et universus Dei Populus accedant oportet ad eam

propter id quod revera est, scilicet quatenus Verbum Dei qui per verba

humana nobiscum loquitur (cfr. 1 Thess 2, 13). Haec est informatio

84 Breviloquium, Prol., Opera omnia, V, Quaracchi 1891, p. 201-202. 85 Summa Theologiae, Ia-IIae, q. 106, art. 2. 86 Pontificia Commissio Biblica, L'interpretazione della Bibbia nella Chiesa (15 Aprilis 1993),

III, A, 3: Ench. Vat. 13, n. 3035. 87 Conc. Oecum. Vat. II, Const. dogm. de divina Revelatione Dei Verbum, 12.