97. (3. ) Hymnus in Assumptione B. Mariae V.

1. Quis possit amplo famine praepotens Digne fateri praemia virginis, Per quam veternae sub laqueo necis Orbi retento reddita vita est?

2. Haec virga lesse, virgo puerpera, Hortus superno germine consitus, Signatus alto munere fons sacer, Mundum beavit viscere caelibi.

3. Hausto maligni primus ut occidit Viro chelydri terrigenum parens, Hinc lapsa pestis per genus irrepens Cunctum profundo vulnere perculit.

4. Rerum misertus sed sator, inscia Cernens piacli viscera virginis, His ferre mortis crimine languido Mandat salutis gaudia saeculo.

5. Missus ab astris Gabriel innubae Aeterna portat nuntia virgini, Verbo tumescit latior aethere Alvus replentem saecula continens.

6. Intacta mater virgoque fit parens, Orbis creator ortus in orbe est, Hostis pavendi sceptra remota sunt, Toto refulsit lux nova saeculo.

7. Sic virginalis vincula permanent, Prodit pudoris dum thalamo potens, Mansere clausae artius ut fores Intrante Deo, quas sera vinxerat.

8. Hoc signat aedis ianua non patens, Quam celsa vatis visio prodidit, Soli tremendo pervia principi, Mansura nempe clausa perenniter.

9. Sit trinitati gloria unicae,

Virtus, potestas, summa potentia, Regnum retentans quae Deus unus est Per cuncta semper saecula saeculi.