Iohannes Peckham, Archiepiscopus Cantuariensis. d. 1292.
390. (1. ) De sanctissima Trinitate.
391. (2. ) De sanctissima Trinitate.
392. (3. ) De sanctissima Trinitate.
393. (4. ) De sanctissima Trinitate.
394. (5. ) De sanctissima Trinitate.
395. (6. ) De Corpore Christi.
396. (7. ) De Sacramento Altaris.
1. Salve, sancta mater Dei, Radix vitae, robur spei
Mortis in angustiis, Per te quaeso consolari, Da sincere meditari
De tuis deliciis.
2. Salve, Deo consecrata,
Priusquam huic mundo nata,
Intra matris uterum, Dono fixa speciali, Ut nec lapsu veniali
Peccares in posterum.
3. Salve, stella principalis, Tui namque lux natalis
Finem fert erroribus; Virginalis flos illuxit, Vita tota formam duxit
Vitae novae moribus.
4. Salve, tantae puritatis Vas, ut regem maiestatis
De supernis traxeris, Gabriele nuntiante Inaudita post et ante
Nuntia susceperis.
5. Salve, tutrix castitatis Nec adhaerens nuntiatis,
Donec certa fieres, Salvo virginali flore Quod caelesti fusa rore Filium conciperes.
6. Salve, casta Sunamitis, Fide credens inauditis,
Dei plena radio; Salve, lux humilitatis, Te ancillam vocans gratis
Data regi filio.
7. Salve, spiritu lustrata, Salve, carne repurgata
Caeli refrigerio; Salve, Deo superfusa, Salve, generans conclusa
Cordis ex incendio.
8. Salve, Deum ventre gerens, Qui humanum genus maerens
Per te sic laetificat; 0 quam gaudens cecinisti, Alvo Christum cum sensisti,
Canticum Magnificat!
9. Salve, partu singularis, Virgo gignens virgo paris,
Virginum purissima; Gaude tanti vultum regis Videns, cuius pannis tegis
Membra sincerissima.
10. Salve, tantam gerens prolem, Fructum vitae laesis, solem
Tenebratis proferens, Visionem pastoralem Stellam viamque regalem
Corde puro conferens.
11. Salve, lege volens regi, Non astricta tamen legi Purgandae puerperae; Nam impurum nil sensisti Nec de viro concepisti, Sed de Dei munere.
12. Salve, templo figurali Finem cultui legali
Ferens tuum filium, Simeone gratulante Sed et tibi comminante Suae mortis gladium.
13. Salve, tutrix Nazarei, Qui est omnis tutor rei,
Secessu Aegyptio, Tui cura et custodis Frustrans furiam Herodis
Fugiens cum filio.
14. Salve, gratulans infantem Ex Aegypto remeantem
Galilaeae civibus; Sic stans extra nunc Iudaeam Tandem visitabit eam
Veniens ex gentibus.
15. Salve, Iesum quae latentem Repperisti disserentem
Tridui post reditum; Laeta tecum reduxisti, Gaudens tecum tenuisti
Regem regum subditum.
16. Salve, cernens coruscantem Miris factis et monstrantem
Deitatis gloriam, Operando potestatem, Praedicando veritatem,
Vitae sanctimoniam.
17. Salve, grandi cum dolore Iesum madidum cruore Cernens in patibulo; Sed hinc minus doluisti, Quod hunc pati credidisti Pro salvando saeculo.
18. Salve, salutis alumna, Salve, fidei columna,
In qua fides floruit, Quando percusso pastore Grex dispersus est timore
Et in fide corruit.
19. Salve. Iesum triumphantem Et infernum spoliantem
Cognoscens cum gaudio. Et post mortem vitae datum Vique sua suscitatum.
Gaudens tali filio.
20. Salve, virgo, videns laeta Mala mundi post deleta
Conscendentem filium, Super solium caeleste Concurrente turba teste
Civium caelestium.
21. Salve, gaudens contemplata De supernis destinata
Munera discipulis, Iuxta filii promissum Spiritum de caelis missum
Igneis in lingulis.
22. Salve, caelitus assumpta, Non mens sola, sed resumpta
Corporis substantia, Ubi sola te transcendit, Olim in te qui descendit,
Incarnati gloria.
23. Salve, iubar singulare, Caeli summi luminare
Toti mundo radians, Universum restauratum Per te videns et substratum
Tibi digne glorians.
24. Salve, virgo tam sublimis, Carceratos nos in imis
Prece tua libera. In te iuva confidentes Et devote recensentes
Data tibi munera.
25. Salve, sola spes salutis, Nos in valle servitutis
Pressos tot miseriis Iuva pia potestate, Tabescentes egestate
Tuis reple gaudiis.
26. Hoc in fine, mater, oro, Votis totis hoc imploro,
Virginum piissima. A me diligi dignare Et me digne fac amare Te, virgo dulcissima.
27. Cessent alii amores, Tui trahant me odores
Et incendant gratiae; Hoc detinear languore, Hoc nutriri da dulcore
Ad obtentum gloriae.