391. (2. ) De sanctissima Trinitate.

Ad Vesperas.

1. In maiestatis solio

Tres sedent in triclinio, Nam non est consolatio Perfecta solitario.

2. Aeternae mentis oculo Dum pater in se flectitur, In lucis suae speculo Imago par exprimitur.

3. Imaginis consortium Nativus praebet exitus, Consorsque spirant gaudium Ingenitus et genitus.

4. Hoc gaudium est spiritus, Quo patri natus iungitur, Et unum bonum funditus In tribus his concluditur.

5. In tribus est simplicitas, Quos non distinguit qualitas, Nec obstat tribus unitas, Quam ampliat immensitas.

6. Per solam vim originis Communio fit numinis Nativi ductu germinis Votivique spiraminis.

7. Ingenito et genito Cum spiritu paraclito Honoris simpli debito Psallamus corde dedito.