Prophetiae aliquot b. patris Francisci.

 Proph. I. Se religionem minorum fundaturum et sibi eam desponsaturum.

 Proph. II. Magnum se multorum principem fore.

 Proph. III. Pauperum amatorem et patriarcham fore.

 Proph. IV. Se per totum mundum respiciendum.

 Proph. V. Sacellum sancti Damiani Clarissarum futurum coenobium.

 Proph. VI. Minorum familiam multiplicandam.

 Proph. VII. Deum pro totius mundi profectu fratres minores misisse.

 Proph. VIII. Pauperum hospitalitatem Deo gratam.

 Proph. IX. Poenam in peccata relabentis esse graviorem.

 Proph. X. Virum quemdam suae mulieri reconciliandum, et nunc esse tempus clementiae, postea aequitatis.

 Proph. XI. Singularitatem et hypocrisim in religioso malam esse et perniciosam.

 Proph. XII. Cardinalem Ostiensem in Papam assumendum.

 Proph. XIII. Ordinum apostatas male interire.

 Proph. XIV. Magnum in ecclesia schisma et tribulationem futuram.

 Proph. XV. Superbiam et fastum religionibus perniciosum, et fratrem Eliam extra ordinem moriturum.

 Proph. XVI. Sanctorum meritis multoties Deum a puniendis peccatoribus se coercere.

Proph. XI. Singularitatem et hypocrisim in religioso malam esse et perniciosam.

Frater quidam erat, quantum exterius videbatur, sanctitate praeclarus, conversatione insignis, tamen admodum singularis. Omni tempore orationi vacans tanta districtione silentium observabat, quod consueverat non verbis, sed nutibus confiteri. Accidit autem sanctum patrem ad locum venire, videre fratrem et de ipso cum aliis habere sermonem. Commendantibus autem omnibus et magnificantibus illum respondit vir Dei: "Sinite et tacete, fratres, ne mihi in eo diabolica figmenta laudetis. In veritate sciatis, quod diabolica tentatio est et deceptio fraudulenta. " Dure hoc acceperunt fratres, tanquam impossibile judicantes, quod tot perfectioni? indiciis fraudis se commenta fuscarent. Verum non post multos dies eo e religione egresso evidenter apparuit, quanta luculentia interioris intuitus vir Dei cordis ejus secreta perspexerit. Bon. 1. c. n. ll..